لیستی مووچەی مانگی هەشت بۆ بەغدا دەنێردرێت

ئاڤا نیوز

لیستی مووچەی مانگی هەشت ئامادەکراوە، سبەینێ بۆ بەغدا دەنێردرێت و ڕۆژی سێشەممە ڕادەستی وەزارەتی دارایی عێراق دەکرێت. وردبینیکردنیش لە لیستی مووچەی مانگی حەوت تەواو بووە.

وێنە گەورەکە: حکومەتی هەرێمی کوردستان بەردەوامە لە ئەنجامدانی پابەندییەکانی بەرامبەر حکومەتی عێراق لەبارەی پرسی مووچە، یەکێک لە ئەرکەکانی ناردنی لیستی مووچەیە، هەرچەندە هێشتا دەست بە هەناردەکردنەوەی نەوت نەکراوە و لەسەر پرسی داهاتی ناوخۆش ڕێکنەکەوتوون، بەڵام مانگانە وەزارەتی دارایی کوردستان لیستی مووچە بۆ بەغدا دەنێرێت، بۆ ئەوەی لەسەر لیستی مووچە ناردنی پارە دوانەکەوێت.

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای ڕاگەیاند، سبەی ئێوارە تیمێکی تەکنیکیی سەر بە وەزارەتەکە دەچێتە بەغدا و لیستی مووچەی مانگی هەشت لەگەڵ خۆی دەبات.

بڕیار بوو لیستی مووچەی مانگەکانی هەشت و نۆ پێکەوە ئامادە بکرێن و بنێردرێن بۆ بەغدا، بەڵام لیستی مووچەی مانگی نۆ پێویستی بە کارکردنی زیاترە، لیستی مووچەی مانگی نۆ هەندێک کەم و زیادی تێدا دەکرێت، بەهۆی مۆڵەتی فەرمانبەران و خانەشینبوون و هەندێک ڕۆتینیاتی دیکە، ئێستا کاری لەسەر دەکرێت و لە 10 ڕۆژی داهاتوودا تەواو دەکرێت.

لەلایەکی دیکەوە: لەبارەی داهاتی ناوخۆ کە ناردنی بەشێکی بۆ بەغدا یەکێکی دیکەیە لە پابەندییەکانی حکومەتی کوردستان، سەرچاوەکەی وەزارەتی دارایی گوتی: داهاتی مانگی حەوت کۆکراوەتەوە، تەنیا ئەوە ماوە هەولێر و بەغدا ڕێک بکەون، ئەم مانگە چەند بنێرن. هەروەها دەست بە کۆکردنەوەی داهاتی ناوخۆی مانگی هەشتیش کراوە، بەڵام هێشتا تەواو نەبووە.

ئەمەش بزانە: لە ڕۆژی 3-8-2025ـەوە لیستی مووچەی مانگی حەوت ڕادەستی فەرمانگەی ژمێریاریی وەزارەتی دارایی فیدراڵی کراوە، لە وەزارەتی دارایی عێراق وردبینیکردن لە لیستەکە تەواو بووە و هیچ گرفتێکی نییە.