یەكێتی هەوڵ دەدات پەیوەندییەكانی لەگەڵ توركیا ئاسایی بكاتەوە

ئاڤا نیوز

بەپێی ڕاپۆرتێكی بەریتانی، یەكێتی هەوڵەكانی بۆ ئاساییكردنەوەی پەیوەندییەكانی لەگەڵ توركیا چڕكردووەتەوە، بەشداریكردنی پەرلەمانتارێكی ئەو حیزبەش لە كۆتا سەردانی سوودانی بۆ توركیا، لە چوارچێوەی هەوڵەكانی ئاساییكردنەوەی پەیوەندییەكانی یەكێتی و توركیا بوو.

وێنە گەورەكە: محەممەد شیاع سوودانی، سەرۆكوەزیرانی عێراق و شاندی یاوەری، لە ڕۆژی 29ـی ئایاری ئەمساڵ، سەردانی توركیایان كرد و لەگەڵ ڕەجەب تەیب ئەردۆغان، سەرۆككۆماری توركیا و بەرپرسانی باڵای ئەو وڵاتە كۆبوونەوە، پەرلەمانتار كاروان یاروەیس، ئەندامی ئەنجوومەنی نوێنەرانی عێراق لە فراكسیۆنی یەكێتیی نیشتمانیی كوردستان، یاوەری سەرۆكوەزیرانی عێراق بوو لەو گەشتەدا.

زانیاریی بەدەستهاتوو: بەپێی ڕاپۆرتێكی ماڵپەڕی 'ئەمواج'ـی بەریتانی كە بابەتەكانی بە زمانەكانی ئینگلیزی، عەرەبی و فارسی بڵاو دەكاتەوە، تێیدا بە وردی شیكردنەوەی بۆ هەوڵەكانی ئاساییكردنەوەی پەیوەندییەكانی یەكێتی و توركیا لەلایەك، ڕۆڵی یەكێتی لە سەرخستنی پرۆسەی ئاشتی لە توركیا لەلایەكی دیكەوە كردووە.

ماڵپەڕەكە لە زاری سەرچاوەیەکی سیاسیی تورکی ئاگادارەوە ئاماژەی بەوە كردووە، كاروان یاروەیس، بە سەرۆكی توركیا، ڕەجەب تەیب ئەردۆغانی وتووە، "یەكێتی خوازیاری چارەسەركردنی كێشەكانە لەگەڵ توركیا و لەو چوارچێوەیەدا داوا دەكەین توركیا گەشتە ئاسمانییەكانی بەرەو فرۆكەخانەی سلێمانی دەستپێبكاتەوە".