مالیکی: "شەمشەمەکوێرەکانی تاریکی" هەوڵی کودەتا بەسەر پڕۆسەی سیاسی لە عێراق دەدەن

ئاڤا نیوز

سەرۆکی هاوپەیمانی دەوڵەتی یاسا، هۆشداریدا لە بوونی کودەتا بەسەر پرۆسەی سیاسیی لە عێراق و ڕایگەیاند، "شەمشەمەکوێرەکانی تاریکی" هەوڵی ئەنجامدانی کودەتا بەسەر پڕۆسەی سیاسی لە عێراقدا دەدەن.

چیرۆکی سەرەکی: دووشەممە 2025-9-8، نووری مالیکی، سەرۆکی هاوپەیمانی دەوڵەتی یاسا لە میانەی بەشداریکردنی لە کۆبوونەوەیەکی خێڵەکان لە پارێزگای بابل بۆ پشتگیریکردنی هاوپەیمانییەکەی لە هەڵبژاردنەکاندا گوتارێکی پێشکەش کرد.

لێدوانی فەرمی: مالیکی ڕایگەیاند، پاراستنی پڕۆسەی سیاسی و بەردەوامیدان بە هەوڵە سیاسییەکان بۆ بونیادنانی دەوڵەت، بنەمای ڕێبازی دەوڵەتی یاسان. جەختیشی لەسەر پێویستی بەردەوامبوون لەسەر پڕۆسەی سیاسی و دەستوور و گەل کردەوە بۆ پاراستنی ئەو پڕۆسەیە.

لەهەمان کاتدا: ناوبراو ڕاشیگەیاند، هاوپەیمانییەکەی "ڕێگە نادات دیکتاتۆرییەت و ڕەگەزپەرستی و تائیفەگەری و گۆڕە بەکۆمەڵەکان و شەڕە بێهوودەکان بگەڕێنەوە". ئاماژەی بەوەشدا "ئامانج ئەوەیە عێراق بەهێز و پتەو بێت و کاریگەری قەیرانەکانی لەسەر نەبێت، هەروەها پارێزگاری لێبکرێت لە بازنەی شەڕ و ڕووبەڕووبوونەوەکان."

لەلایەکی دیکەوە: مالیکی ئاماژەی بەوەشکرد، "عێراق بە فتوای مەرجەعییەتی ئایینی بەسەر داعشی تیرۆریستیدا سەرکەوت"، داواشی کرد دەستوور وەک بنەما بۆ مامەڵەکردن لە نێوان عێراقییەکان و بۆ گواستنەوەی ئاشتییانەی دەسەڵات لە ڕێگەی سندوقەکانی دەنگدانەوە پەیڕەو بکرێت. وتیشی، "سەردەمی تانک و پیلانگێڕییەکان کۆتایی هاتووە و گۆڕانکاری لە ڕێگەی سندوقی پیرۆزی هەڵبژاردنەوە دەبێت."

لە کۆتایی قسەکانیدا، مالیکی وتی: "نیگەران مەبن لە قسە و باس و پڕوپاگەندەکان، بە هەوڵی گەلەکەمانەوە بەرەو پێکهێنانی پەرلەمان و حکومەت و پڕۆسەی سیاسی دەڕۆین بەدوور لە ئاڵنگاری و فشارە دەرەکییەکان."