بۆ جاری دووەم.. "یەزن مەشعان جبووری" لە کێبڕکێی هەڵبژاردن دوورخرایەوە

ئاڤا نیوز

کۆمسیۆنی باڵای سەربەخۆی هەڵبژاردنەکانی عێراق، بڕیاریدا یەزن مەشعان جبووری بۆ جاری دووەم لە کێبڕکێی هەڵبژاردن دووربخاتەوە.

وێنە گەورەکە: بڕیارە 11-11-2025 هەڵبژاردنی خولی نوێی پەرلەمانی عێراق بکرێت و زیاتر لە حەوت هەزار کاندید کێبڕکێ لەسەر 329 کورسییەکەی پەرلەمان دەکەن، تا ئێستاش کۆمیسیۆن بەهۆکاری جیاواز ژمارەیەک کاندیدی دوورخستووەتەوە.

زانیاریی بەدەستهاتوو: سەرچاوەیەکی ئاگادار بە میدیای عێراقی ڕاگەیاند، بڕیاری دوورخستنەوەی "کوڕی سیاسیی عێراقی مەشعان جبووری" لەسەر بنەمای دۆسیەی "دزەپێکردنی دەنگی" بووە.

زانیاریی زیاتر: ئەم بڕیارە نزیکەی سێ هەفتە دوای دوورخستنەوەی جبووری دێت لە 20ی ئابی ڕابردوو، پاش دەرکەوتنی فەرمانێکی کۆنی دەستگیرکرتنی لە کاتی وردبینیکردنی زانیارییەکان، ئەمەش وای لە کۆمیسیۆن کرد 72 کاتژمێری پێبدات بۆ پێشکەشکردنی بەڵگەنامەیەک کە نادروستییەکەی بسەلمێنێت.

چی ڕوویدا: دواتر ئەم دۆسیەیە لەلایەن وەزارەتی ناوخۆی هەرێمی کوردستانەوە چارەسەر کرا، ئەمەش ڕێگەی بە گەڕانەوەی کاتیی ناوبراو دا بۆ کێبڕکێی هەڵبژاردن.

لەلایەکی دیکەوە: ئەمڕۆ دووشەممە، دەستەی نیشتمانی لێپرسینەوە و دادپەروەری لە عێراق، کۆتاییهاتنی پڕۆسەی وردبینییەکی گشتگیری بۆ سەرجەم ناوی کاندیدانی هەڵبژاردنی داهاتووی ئەنجوومەنی نوێنەران ڕاگەیاند، کە ژمارەیان نزیکەی هەشت هەزار کاندیدە.