دەستەی لێپرسینەوە و دادپەروەریی عێراق زیاتر لە 300 کاندید دوور دەخاتەوە

ئاڤا نیوز

ئەمڕۆ دووشەممە، دەستەی لێپرسینەوە و دادپەروەریی عێراق وردبینی بۆ ناوی کاندیدەکانی هەڵبژاردنی پەرلەمانی عێراق تەواوکرد و ڕایگەیاند؛ بەهۆی ڕێکارەکانی دەستەکە، 335 کاندید دوور خراونەتەوە.

چیرۆکی سەرەکی: کۆمیسیۆنی باڵای سەربەخۆی هەڵبژاردنەکانی عێراق ناوی کاندیدەکانی بۆ لایەنە پەیوەندیدارەکان ناردووە بۆ وردبینی کردن و جێبەجێبوونی مەرجەکان لەسەریان لەوانەش، وەزارەتەکانی ناوخۆ، داد و دەزگای هەواڵگری و دەستەی لێپرسینەوە و دادپەرەوەری.

ڕاگەیێنراوی فەرمی: دەستەی لێپرسینەوە و دادپەروەریی عێراق ڕایگەیاند: پرۆسەی وردبینیکردنی تایبەت بە هەڵبژاردن بۆ نزیکەی هەشت هەزار ناو کراوە لەوانە؛ ژمارەی ئەوانەی ڕێکارەکانی یاسای لێپرسینەوە و دادپەرەوەری دەیانگرێتەوەو دوور خراونەتەوە 335 کەس بوون.

زانیاریی زیاتر: بەپێی یاسای دەستەکە کاندیدی دوورخراو مافی تانەدانی لە دادگا لە ماوەی مانگێکدا هەیە، بە مەرجێک لە ماوەی مانگێکی دیکەدا بڕیاری کۆتایی لەبارەی دۆسیەکەی بدرێت.

لەلایەکی دیکەوە: ڕۆژی یەکشەممە، عیماد جەمیل، سەرۆکی تیمی راگەیاندنی کۆمیسیۆن بە ئاڤا میدیای گوت: تا ئێستا 751 کاندید بۆ هەڵبژاردنی پەرلەمانی عێراق دوورخراونەتەوە.

ئەوەی پێویستە بیزانیت: دەستەکە بەپێی یاسای ژمارە 10ـی ساڵی 2008 کاردەکات و لە چوارچێوەی ئەو ئەرکانەی کە لەڕووی دەستووری و یاساییەوە پێی سپێردراوە، بە وردی وردبینی لە هەموو ئەو ناوانە دەکات کە لەلایەن لایەنە پەیوەندیدارەکانەوە پێشکەشی دەکرێن لەوانەش؛ کاندیدەکانی پەرلەمان، ئەنجوومەنی پارێزگاکان، سێ سەرۆکایەتییەکە و کارمەندانی وەزارەتەکان و دەزگا ئەمنییەکان، بە ئامانجی ئاشکراکردنی پەیوەندیی کاندیدەکان بە ڕژێمی حیزبی بەعسەوە.