سەرۆک بارزانی: ڕێگە نادەین دەستوور پێشێل بکرێت

ئاڤا نیوز

سەرۆک بارزانی لە چاوپێکەوتنێکیدا لەگەڵ FRANCE 24 باسی لە کێشەکانی نێوان بەغدا و هەولێر و پێکهێنانی حکومەتی نوێی کوردستان کرد.

چیرۆکی سەرەکی: کەناڵی FRANCE 24، چاوپێکەوتنێکی لەگەڵ سەرۆک بارزانی ئەنجامداوە، تێیدا سەرۆک بارزانی تیشک دەخاتەسەر کێشەکانی نێوان هەولێر و بەغدا و پێکهێنانی کابینەی نوێی حکومەتی هەرێمی کوردستان.

لێدوانی فەرمی: سەرۆک بارزانی ڕایگەیاند، بەداخەوە لە بارەی ڕێککەوتنی بەغدا و هەولێر کێشە هەیە، پێویستە لەوبارەیەوە ڕاستگۆ بین ئەگەر نیەتی ڕاستەقینە بۆ چارەسەرکردنی کێشەکان هەبێت، ئێمە دەتوانین سەرکەوتووبین.

ئێمە دەستوورێکمان هەیە کە نەخشە ڕێگایە بۆ ئێمە و بۆ بەغداش، ئێمە داوای زیاتر لەوە ناکەین کە لە دەستووردا بۆمان دیاریکراوە، هەرچۆنێک بێت، ئێمە ڕێگە نادەین دەستوور پێشێل بکرێت.

زانیاریی زیاتر: بارزانی هیوای خواست دەستوور جێبەجێ بکرێت، وتی کێشەمان هەیە لەوەی دانناندرێت بە سیستمی فیدراڵیدا. ئێستا کێشەی ئێمە لەگەڵ بەغدا ئەوەیە، ئەوان دان بە فیدراڵیزمدا نانێن.

لەلایەکی دیکەوە: بارزانی وتی، "بەداخەوە، خۆشحاڵ نین بەم دۆخە کە حکومەتی هەرێمی کوردستان پێکنەهێنراوە، هیوادارین لە مانگی نۆ یان لە چەند ڕۆژی داهاتوودا پەرلەمان دووبارە بتوانێت کۆببێتەوە، بۆ دەستپێکردن بە خولی نوێ و  پێکهێنانی حکومەت."