ئاڤای خەڵك؛ گەنجێکی 26 ساڵ لە کۆیە چوار ڕۆژە بێسەروشوێنە

ئاڤا نیوز

گەنجێکی تەمەن 26 ساڵ، ماوەی چوار ڕۆژە لە کۆیە بێسەروشوێنە و کەسوکارەکەی داوای یارمەتی دەکەن بۆ دۆزینەوەی.

چیرۆکی سەرەکی: ماوەی چوار ڕۆژە گەنجێکی کۆیە بێسەروشوێنە و دوایین شوێنی دیاریکراوی گەنجەکە بەپێی سیگناڵی مۆبایلەکەی، کاتژمێر 11ـی پێشنیوەڕۆی ڕۆژی پێنجشەممە بووە، کە لە نزیک سەنگەسەر لە پشدەر بووە. دوای ئەو کاتە، مۆبایلەکەشی داخراوە و هیچ زانیارییەکی دیکە لەبارەیەوە بەردەست نییە.

زانیاریی بەدەستهاتوو: کەسوکاری گەنجەکە بە ئاڤایان وت، کوڕەکەیان ڕۆژی چوارشەممەی ڕابردوو بە سەردان چووەتە چوارقوڕنە بۆ ماڵی ئامۆزاکەی. ڕۆژی پێنجشەممە، بە ئامۆزاکەی وتووە کە دەچێت سەرێک لە ڕانیە دەدات و پاشان لەوێوە دەگەڕێتەوە بۆ کۆیە، بەڵام لەو کاتەوە پەیوەندییەکانی پچڕاوە.

کەسوکاری گەنجەکە جەخت لەوە دەکەنەوە کە کوڕەکەیان هیچ کێشەیەکی کۆمەڵایەتی یان تایبەتی نەبووە و هیچ گومانێکیشیان لە کەس نییە.

لێدوانی فەرمی: پۆلیسی ڕاپەڕین بە ئاڤای وت، تا ئێستا هیچ سکاڵایەکی فەرمیمان لەبارەی بێسەروشوێنبوونی ئەم گەنجەوە پێنەگەیشتووە، بۆیە نەیانتوانیوە بەدواداچوون بۆ دۆسیەکە بکەن.

کەسوکار و هاوڕێیانی گەنجە بێسەروشوێنبووەکە داوا لە هەر کەسێک دەکەن کە زانیاریی لەبارەیەوە هەیە، پەیوەندی بە نزیکترین بنکەی پۆلیسەوە بکات یان ئاگاداری کەسوکارەکەی بکاتەوە.