قوباد تاڵەبانی: پەیوەندیی بازرگانی نێوان کوردستان و ئەمریکا یارمەتیدەر دەبێت لە گەیشتن بە ئامانجەکان

ئاڤا نیوز

قوباد تاڵەبانی، جێگری سەرۆکوەزیرانی هەرێمی کوردستان پێشوازی لە شاندێکی بازرگانی ئەمریکا کرد و لە دیدارێکدا گفتوگۆی پەرەپێدانی پەیوەندیی بازرگانی نێوان کوردستان و ئەمریکایان کرد.

چیرۆکی سەرەکی: ئەمڕۆ دووشەممە 2025-09-08، قوباد تاڵەبانی، جێگری سەرۆکوەزیرانی هەرێمی کوردستان پێشوازی لە شاندێکی بازرگانی ئەمریکا کرد کە پێکاهتوون لە ستیڤ لۆتس، جێگری سەرۆکی ژووری بازرگانیی ئەمریکا و شاندی ژووری بازرگانی ئەمریکا.

لێدوانی فەرمی: قوباد تاڵەبانی، جێگری سەرۆکوەزیران گوتی، گفتوگۆمان کرد لەبارەی چۆنییەتی سوودوەرگرتن لە تەکنەلۆژیای نوێ و ژیریی دەستکرد لە پرۆسەی گەشەپێدانی ئابووریی کوردستان و پەرەپێدانی پەیوەندیی بازرگانی نێوان کوردستان و ئەمریکا. 

قوباد تاڵەبانی ئەمانەشی وت:

٠ باسمان لە هەوڵەکانمان کرد لە پەرەپێدانی تواناکانی گەنجانی کوردستان لە بوارەکانی تەکنەلۆژیا و کارسازیدا، چونکە ئەم گەنجە بەهرەمەند و داهێنەرانە دەتوانن ڕۆڵ ببینن لە بەکارهێنانی تەکنەلۆژیای نوێ و ژیریی دەستکرد لە پرۆسەی گەشەپێدانی کوردستان.

٠ بەهێزترکردنی پەیوەندیی بازرگانی نێوان کوردستان و ئەمریکا یارمەتیدەرمان دەبێت لە گەیشتن بە ئامانجەکەمان کە دەمانەوێت لە داهاتوودا هەرێمی کوردستان هەم وەک ناوەندێکی گرنگی ئابووری و هەم وەک ناوەندێکی گرنگی تەکنەلۆژیا لە ناوچەکەدا دەربکەوێت.

٠ لە کوردستان دەرفەتی زۆر گەورە هەیە کە ببێتە هاوبەشێکی گرنگی بازرگانیی ئەمریکا لە ناوچەکەدا.