مالیکی: دواخستنی هەڵبژاردن ئامانجی ڕووخانی پرۆسەی سیاسییە

ئاڤا نیوز

ڕۆژی دووشەممە، نووری مالیکی، ئەمینداری گشتیی حیزبی دەعوەی ئیسلامی هاوکات سەرۆکی هاوپەیمانیی دەوڵەتی یاسا، بە تەواوی دواخستنی هەڵبژاردنی ڕەتکردەوە، دووپاتیشی کردەوە، ئامانجی کۆتایی هێنانە بە پرۆسەی سیاسی لە عێراق.

وێنە گەورەکە: بڕیارە لەکۆتایی ئەمساڵ هەڵبژاردنی پەرلەمانی عێراق بکرێت، چاوەڕوان دەکرێت ڕکابەرییەکی تووند لە نێوان لایەنە سیاسییەکان هەبێت و گۆڕانکاریش لە نەخشەی سیاسیی ئێستای عێراق ڕووبدات. کۆمیسیۆنیش پابەندبوونی خۆی بە ئەنجامدانی هەڵبژاردن لە وادەی دیاریکراوی خۆیدا دووپات کردووەتەوە.

ڕاگەیێنراوی فەرمی: نووری مالیکی لە وتارەکەیدا جەختی لەسەر گرنگیی بەشداریکردنی جەماوەری لە هەڵبژاردنەکاندا کردەوە و  ئاماژەی بەوەشکرد، "دواخستنی بە مانای داڕمانی شەرعیەتی پەرلەمان و حکومەت دێت و دۆخی ئاژاوەگێڕی بەدوایدا دێت".

زانیاریی زیاتر: پێشتریش مالیکی هۆشداریی دابوو "هەر کەسێک باسی دواخستنی هەڵبژاردن بکات ئێمە قبووڵی ناکەین" پێیوایە ئەنجامنەدانی هەڵبژاردن عێراق بەرەو دابەشبوون دەبات.

ئەوەی پێویستە بیزانیت: ئەمەش لە کاتێکدایە دوو مانگ ماوە بۆ بەڕێوەچوونی هەڵبژاردن، پێشبینی دەکرێت لە ماوەی داهاتوودا، ئیسرائیل بە هاوکاریی ئەمریکا هێرش بکاتە سەر پێگەی گرووپە چەکدارەکان ئەگەر یاسای دەستەی حەشدی شەعبی پەسەند بکرێت و مەترسیی ئەوە هەیە ئەو وڵاتە لە داهاتوودا ببێتە گۆڕەپانی شەڕ لەنێوان ئیسرائیل و ئێران، ئەگەر یەکێک لەم ئەگەرانە ڕوو بدەن، بە ئەگەرێکی زۆر هەڵبژاردنی پەرلەمان دوا دەخرێت.