سەرۆکوەزیران مەسرور بارزانی بۆ ئاڤا: نزیکین لە چارەسەری کۆتایی سەرجەم کێشەکان لەگەڵ بە‌غدا

ئاڤا نیوز


سەرۆکوەزیران مەسرور بارزانی لە پێشانگەی نێودەوڵەتیی وەبەرهێنان و خانووبەرە ڕایگەیاند: ئێستا شاندی هەرێمی کوردستان لە بەغدان، نزیکین لە چارەسەری تەواوی کێشەکان.


چیرۆکی سەرەکی: ئەمڕۆ سێشەممە بە ئامادەبوونی سەرۆکوەزیران مەسرور بارزانی، شەشەمین پێشانگای نێودەوڵەتیی وەبەرهێنان و خانووبەرە لە هەولێر کرایەوە، هەر لە پێشانگاکەدا 280 کۆمپانیای ناوخۆ و دەرەکی لە 16 وڵاتی جیاوازەوە بەشدارییان تێدا کردووە.


لێدوانی فەرمی: مەسرور بارزانی، سەرۆکوەزیرانی هەرێمی کوردستان لە لێدوانێکی تایبەتدا بە ئاڤای ڕاگەیاند: خۆشحاڵین کە وەبەرهێنەری وڵاتانی دیکە سەردانی هەرێمی کوردستان دەکەن بۆ وەبەرهێنان ئەمەش دەرخەری سەقامگیری ئاسایشی کوردستانە. هەر بۆیە سوپاسی ماندووبوونی پێشمەرگەی کوردستان دەکەم. 


هەوڵمانداوە سەرجەم کێشەکان لەگەڵ حکومەتی فیدراڵی بە لێکتێگەیشتن و گفتوگۆ چارەسەر بکەین، ئێستا شاندی هەرێمی کوردستان لە بەغدان، نزیکین لە چارەسەری تەواوی کێشەکان.

گرفت نەماوە بۆ دووبارە هەناردەکردنەوەی نەوتی کوردستان و لە قۆناغی کۆتایی داین، تەنها ئەوەیە کۆمپانیاکانی بواری نەوت داوای دەستبەرکردنی گرێنتی لە حکومەتی عێراق دەکەن.


لەلایەکی دیکەوە: سەرۆکوەزیران مەسرور بارزانی، لە بەشێکی دیکەی قسەکانیدا ڕایگەیاند: بانگهێشتنامەمان ناردووە تاوەکو کۆمپانیاکانی ئەمریکا بێنە کوردستان، دوای پێشانگاکە کۆبوونەوەم لەگەڵ کۆمپانیا ئەمریکییەکان هەیە.

سیاسەتی حکومەتی هەرێمی کوردستان بۆ فرەچەشنکردنی سەرچاوەکانی داهات بووە، دەمانەوێت ئابووریی بەرەو پێش ببەین.