ئەنجوومەنی وەزیرانی کوردستان لەبارەی پرسی مووچە و نەوت و سێ تەوەری دیکە کۆدەبێتەوە

ئاڤا نیوز

 

بە گوێرەی زانیارییەکانی ئاڤا ئەمڕۆ لە کۆبوونەوەی ئەنجوومەنی وەزیرانی کوردستان، گفتوگۆ لەبارەی پرسی مووچە و بڕیارەکانی محەممەد شیاع سوودانی، سەرۆکوەزیرانی عێراق دەکرێت. 

 

چیرۆکی سەرەکی: بڕیارە ئەمڕۆ چوارشەممە ڕێککەوتی 10ـی 9ـی 2025 ئەنجوومەنی وەزیرانی هەرێمی کوردستان بە سەرپەرشتی سەرۆکوەزیران مەسرور بارزانی کۆببێتەوە و چەند تەوەرێکی گرنگ و پەیوەست بە ژیانی خەڵک تاوتوێ بکات.

 

وێنە گەورەکە: ڕۆژی سێشەممە ئەنجوومەنی وەزیرانی عێراق بەسەرپەرشتیی محەممە شیاع سوودانی، سەرۆکوەزیران کۆبووەوە، لە کۆبوونەوەکەدا سوودانی دوو بڕیاری سەبارەت بە پرسی پەیوەست بە مووچەی خەڵکی کوردستان دەرکرد ئەوانیش نەوت و داهاتی ناوخۆ بوون. سوودانی داوای لە وەزیرانی کورد کردبوو حکومەتی کوردستان لەو بڕیارە ئاگادار بکەنەوە، ئەوانیش پەیامەکەیان بە حکومەتی کوردستان گەیاندووە.

 

زانیاریی ئاڤا: ئاڤا زانیویەتی لە کۆبوونەوەی ئەمڕۆی ئەنجوومەنی وەزیرانی کوردستان بەسەرپەرشتیی مەسرور بارزانی، گفتوگۆ لەبارەی پرسی مووچە و بڕیارەکانی سوودانی دەکرێت پەیوەست بە داهاتی نانەوتی کە ئاراستەی ئەنجوومەنی دەوڵەت کراوە.

 

هاوکات: لەبارەی پرسی نەوتیش، بەفەرمی وەڵامی بڕیاری سوودانی دەدرێتەوە لەبارەی ئەوەی کۆمپانیای سۆمۆ لە ئەمڕۆ چوارشەممەوە دەست بە وەرگرتنی نەوتی کوردستان بکات.

 

زانیاریی زیاتر: ئێستا توانای هەرێمی کوردستان لە بەرهەمهێنانی نەوت ڕۆژانە زیاتر لە 200 هەزار بەرمیلە. حکومەتی هەرێمی کوردستان ڕۆژانە 50 هەزار بەرمیلی بۆ پێداویستی ناوخۆ دەهێڵێتەوە و ئەوەی دیکەی دەداتە کۆمپانیای سۆمۆ.

لەلایەکی دیکە: لە کۆبوونەوەی ئەمڕۆدا گفتوگۆ لەبارەی پێشنیازی سوودانی دەکرێت بۆ ڕێککەوتنامەنی سێقۆڵی لەنێوان هەولێر و بەغدا و کۆمپانیاکان.

 

بە تەنیشت ئەم بابەتەوە:  هەر لە کۆبوونەوەکەی ئەمڕۆدا سێ تەوەری گرنگ و پەیوەست بە ژیانی خەڵک دەکرێن. تەوەرەکان بریتین لە: یاسای ڕاژە و خانەنشینی پێشمەرگە، پێشنیارێک سەبارەت بە قەرز و پێشینەکانی هاونیشتمانییان، هەروەها ڕێکخستنەوەی ڕێکار و ڕێنماییەکانی تایبەت بە باج.