لیژنەی ئەمنیی عێراق: ئامادەکارییەکان بۆ هەڵبژاردن کۆتاییهات

ئاڤا نیوز

 

وتەبێژی لیژنەی ئەمنیی هەڵبژاردنەکانی عێراق دەڵێت، سەرجەم ئامادەکارییەکان بۆ هەڵبژاردنی مانگی 11 تەواوبوون، ئاشکراشی دەکات کە ڕۆژی دەنگدان قەدەغەی هاتووچۆ نابێت و خەڵک دەتوانێت لەنێوان پارێزگاکان هاتووچۆ بکات و دەنگ بدات.

 

وێنە گەورەکە: مانگی 11ـی ئەمساڵ هەڵبژاردنی خولی نوێی پەرلەمانی عێراق بەڕێوەدەچێت و زیاتر لە حەوت هەزار کاندید کێبڕکێ لەسەر 329 کورسییەکەی پەرلەمان دەکەن، تا ئێستاش کۆمیسیۆن بەهۆکاری جیاواز ژمارەیەک کاندیدی دوورخستووەتەوە و وردبینیش لە ناوی کاندیدەکان بەردەوامە.

 

لێدوانی فەرمی: فەریق سەعەد مەعەن، وتەبێژی لیژنەی باڵای ئەمنیی تایبەت بە هەڵبژاردنی پەرلەمانی عێراق بە میدیای فەرمیی عێراقی ڕاگەیاند، سەرجەم ئامادەکارییەکان بۆ هەڵبژاردنی داهاتوو تەواوبوون و پێداگرن لەسەر ڕەخساندنی ژینگەیەکی ئارام بۆ هاووڵاتییان لە سەرجەم پارێزگاکان، لە ڕۆژی هەڵبژاردنیش ڕێگەی هاتووچۆی نێوان پارێزگاکان و ناوشارەکان داناخرێت بۆ ئەوەی هاووڵاتییان بە ئاسانی بگەنە ناوەندەکانی دەنگدان.

 

لای خۆیەوە عیماد جەمیل، ئەندامی تیمی ڕاگەیاندنی کۆمیسیۆنی هەڵبژاردنەکان ڕایگەیاند، ڕۆژی هەڵبژاردن و دوای کۆتاییهاتنی دەنگدان یاسا کۆمیسیۆنی پابەند کردووە بەوەی دەبێت لە ماوەی شەش کاتژمێردا ئەنجامی هەڵبژاردنەکان لە بنکەکانەوە لەڕێگەی سێرڤەرەوە ڕەوانەی ناوەندی تۆماری ئەنجامەکان لە بەغدا بکات.