هۆشداری لە کڕینی ئەو زەوییانە دەدرێت کە بەسەر فەرمانبەران دابەش دەکرێن

ئاڤا نیوز

 

سەرۆکی شارەوانیی هەولێر هۆشداری لە کڕینی ئەو زەوییانە دەدات کە بە فەرمانبەران دەدرێت و دەڵێت، "پێویستە تا کاتی بەناوکردن کەس ئەو زەویانە نەکڕێت".

 

وێنە گەورەکە: لە کابینەی نۆی حکومەتی هەرێمی کوردستان، پڕۆسەی دابەشکردنی زەوی بەسەر فەرمانبەران و خانەنشینان دەستیپێکردووە، خەڵکیش خواستی لەسەر کڕینی زەوییەکان زۆرە.

 

لێدوانی فەرمی: کارزان هادی، سەرۆکی شارەوانیی هەولێر بە ئاڤا میدیای ڕاگەیاند، هاوتەریب لەگەڵ دانانی نەخشە کەرتییەکان و کوژاندنەوەی زەوییەکان لە بەڕێوەبەرایەتیی کشتوکاڵ لە بەڕێوەبەرایەتی تاپۆ، تاپۆ دەکرێن بەناو دەکرێن.

 

سەرۆکی شارەوانی دەشڵێت، کە زەوییەکان بەناوکران ئەو کاتە وێنەی تۆماریان پێ دەدەین پاشان فەرمانبەران دەتوانن کڕین و فرۆشتنیان پێوە بکەن.

 

ئەوەی پێویستە بیزانیت: سەرۆکایەتیی شارەوانیی هەولێر لە سەرجەم بەڕێوەبەرایەتییەکان پێداچوونەوە دەکات، هەر کەسێک پێشتر سوودمەند بووبێت لە وەرگرتنی زەوی، ئێستاش فۆرمی پڕکردبێتەوە و ناویشی هاتبێتەوە، ئەوا زەوییەکە ناکرێت بە ناوییەوە.

 

زانیاریی زیاتر: قۆناغی بەناوکردنی زەوییەکان دەستیپێکردووە، ئەو سێ هەزار زەوییەی لە  گوندی ئاشۆکان لە سنووری هەولێر بەسەر فەرمانبەراندا دابەشکراون، ئێستا ڕێکاری پەسەندکردنی کۆتایی بۆ دەکرێت و ڕەوانەی تاپۆ دەکرێن.

 

لەلایەکی دیکەوە: ئێستا بەشێکی دیکەی زەوییەکان کە ئامادەکراون لە بەڕێوەبەرایەتیی کشتوکاڵ کاری کوژاندنەوەیان بۆ دەکرێت، هاوکات کار بۆ دیاری کردنی زەوی بۆ خاوەن مافەکان [ئەوانەی قەرەبوو دەکرێنەوە] دەکرێت.

بۆچی گرنگە: هۆشدارییەکەی سەرۆکایەتیی شارەوانیی هەولێر لەپێناو زەرەرمەندنەبوونی خەڵکە و ڕێگری کردنە لە چەند بارەبوونەوەی فرۆشتنی زەوییەک بە چەند کەسێک بە بێ هیچ بەڵگەنامەیەکی فەرمی خاوەندارێتییەکەی.