وشکەساڵی دەیان خێزان لە ناسرییە ناچار بە ئاوارەبوون دەکات

ئاڤا نیوز

وشکەساڵی 250 خێزان لە ڕۆژهەڵاتی ناسرییە بەرەو ناوەندەکانی شارەکە ناچار بە ئاوارەبوون دەکات و "سەرچاوەکانی بژێوییان لەدەستداوە".

وێنە گەورەکە: عێراق یەکێکە لەو وڵاتانەی زۆرترین کاریگەریی گۆڕانی کەشوهەوای لەسەرە، لەلایەکی دیکەوە تا دێت دیاردەی بە بیابانبوون لە پارێزگاکانی باشوور زیاتر دەبێت و خەڵکی ئەو ناوچانە ئاوارە دەبن.

لێدوانی فەرمی: بەسام غەزی، بەڕێوەبەری فەرمانگەی کۆچ و کۆچبەران لە ناسرییە، لە لێدوانێکدا بە ئاڤا میدیای ڕاگەیاند، لە سەرەتای ئەمساڵەوە تا ئێستا 250 خێزانی نوێی ئاوارە تۆمارکراون، ئەمەش بەهۆی لێکەوتەکانی گۆڕانکارییەکانی کەشوهەوا کە کاریگەری ڕاستەوخۆی لەسەر واقیعی ژیان لە پارێزگاکەدا هەبووە.

هۆکارە زانراوەکان: بەگوتەی بەسام غەزی، "گۆڕانکارییەکانی کەشوهەوا کاریگەری لەسەر ناوچە کشتوکاڵییەکان و زۆنگاوەکان دروست کردووە، ئەمەش بووەتە هۆی ئاوارەبوونی دەیان خێزان کە سەرچاوەکانی بژێوییان لەوێ لەدەستداوە"، ئاماژەی بەوەشکرد "شەپۆلەکانی وشکەساڵی و کەمبوونەوەی ئاو زۆرێک لە خێزانەکانی ناچار کردووە ناوچە ڕەسەنەکانیان جێبهێڵن".

لەهەمان کاتدا: بەڕێوەبەری فەرمانگەی کۆچ و کۆچبەرانی ناسرییە وتی، "خێزانە ئاوارەبووەکان لە قەزاکانی سەید دەخیل و ئیسلاح کۆبوونەتەوە، جگە لە ژمارەیەک ناوچەی دیکە کە دەکەونە ڕۆژهەڵاتی پارێزگاکەوە، چونکە دوای جێهێشتنی زۆنگاوەکان و لادێکان ڕوویان لە ناوەندەکانی شارەکان کردووە".

"تیمەکانی کۆچبەری چاودێری دۆخی ئەم خێزانانە دەکەن و چاوەڕێی پاڵپشتی وەزارەتن بۆ دابینکردنی سەبەتەی خۆراک و تەندروستی بۆیان".