وەقفی سوننی لە مزگەوتەکان "دەف" قەدەغە دەکات

ئاڤا نیوز

دیوانی وەقفی سوننی، ڕێنماییەکی ئاراستەی سەرجەم بەڕێوەبەرایەتییەکانی کرد، بە پێی ئەو ڕێنماییە بەهەموو شیوەیەک ڕێگە بە بەکارهێنانی "دەف" لە مزگەوتەکان نادرێت، بەڵام بەهۆی کارداناوەکان لە بڕیارەکە پەشیمان دەبێتەوە.

ڕاگەیێنراوی فەرمی: بەپێی ڕاگەیێنراوێکی دیوانی وەقفی سوننی،  ڕێنماییەکە لەلایەن سەرۆکی دیوان لە 10ـی ئەم مانگەدا دەرچووە و لەمەودوا بەهەموو شێوەیەک دەف لێدان لە بۆنە ئایینی و مەدح و مەولوودەکان لەنێو حەرەمی مزگەوتەکانی سەر بە دیوانی وەقفی سوننی قەدەغەکراوە.

زانیاریی زیاتر: بەپێی ڕێنماییەکە هەر بەڕێوەبەرایەتییەک یان بەرپرسی مزگەوتێک پابەند نەبێت بە ڕێنماییەکە لێپێچینەوەی لەگەڵدا دەکرێت.

ئەمەش بزانە: پێشتر لێدانی دەف لەگەڵ سرودی ئایینی و مەدح و سەنا بۆ مەولوودی پێغەمبەر لەنێو مزگەوتەکان ڕێگەپێدراوبوو.

کاردانەوەکان: ڕێنماییەکەی وەقفی سوننی کاردانەوەی لە تۆڕە کۆمەڵایەتییەکان لێکەوتووە، بۆیە دیوانی وەقفی سوننی زۆر بەخێرایی ڕوونکردنەوەیەکی لەبارەی نووسراوەکەیەوە بڵاوکردەوە و  لەو ڕێنماییانە پاشگەز بووەوە.

ڕوونکردنەوەی فەرمی: لە ڕوونکردنەوەکەدا جەختی لەوە کردووەتەوە کە ئایینی ئیسلامی پیرۆز ئایینێکی لێبوردەیی و بەزەییە و بەکارهێنانی دەف لە دەربڕینی خۆشیدا لە بۆنە ئایینییەکاندا، لەوانەش ئاهەنگگێڕان بۆ یادی لەدایکبوونی پێغەمبەری ئیسلام (د.خ)، بەپێی ئاداب و  پەیڕەوکراوەکان ڕێگەپێدراوە.