بەمەبەستی ئاساییکردنەوەی دۆخی شنگال داوا دەکرێت "گرووپە بیانییەکان" دەربکرێن

ئاڤا نیوز

سەرۆکی لیژنەی ئەمنی لە ئەنجوومەنی پارێزگای نەینەوا هۆکارەکانی دواکەوتنی گەڕانەوەی ئاوارەکان بۆ ناوچەکانی ڕۆژئاوای پارێزگاکە لە قەزای شنگال و دەوروبەری دیاری دەکات و داوا لە حکومەت دەکات بە زووترین کات هێز و گرووپە بیانییەکان دەربکات بۆ ئاساییکردنەوەی دۆخی شارەکە.

ئەوەی پێویستە بیزانیت: هەولێر و بەغدا لە 9ـی تشرینی یەکەمی 2020 ڕێککەوتنێکیان بۆ ئاساییکردنەوەی دۆخی شنگال واژۆ کرد، بەڵام بەپێی لێدوانی بەرپرسانی هەرێمی کوردستان تا ئێستا بەهۆی هۆکاری سیاسی ڕێککەوتنەکە نەچووەتە بواری جێبەجێکردنەوە.

لێدوانی فەرمی: محەممەد کاکەیی، سەرۆکی لیژنەی ئەمنی لە ئەنجوومەنی پارێزگای نەینەوا، بە ئاڤا میدیای ڕاگەیاند، دەیان هەزار ئاوارە، بەتایبەتی ئێزدییەکان، هێشتا نەگەڕاونەتەوە زێدی خۆیان.

هۆکارە زانراوەکان: کاکەیی ئاماژەی بەوەشدا، نەبوونی ئیدارەیەکی مەیدانی بۆ شنگال و بەڕێوەبردنی یەکە ئیدارییەکان لە دەرەوەی پارێزگاکە، هۆکارێکی سەرەکییە بۆ نەگەڕانەوەی ئاوارەکان.

لەلایەکی دیکەوە: بەهۆی نەبوونی خزمەتگوزاری، وێرانبوونی ماڵ و ژێرخان و قەرەبوونەکردنەوەی زیانلێکەوتووان. کە تاوەکو ئێستا زیاتر لە 40 هەزار خێزان قەرەبوویان وەرنەگرتووە. هاوکات ئاوارەکان لە کەمپەکاندا ڕاهاتوون بە پشتبەستن بە یارمەتییە مرۆییەکان.

داواکاری فەرمی: سەرۆکی لیژنەی ئەمنی لە نەینەوا داوای لە حکومەتی عێراق کرد دەستبەجێ هەموو هێز و گرووپە بیانییەکان، بەتایبەتی "پارتی کرێکارانی کوردستان و هێزەکانی تورکیا لە باشیک و گرووپە بیانییەکانی دیکە لە نەینەوا"، دەربکات.

ئەمەش بزانە: پارێزگای دهۆک و ئیدارەی سەربەخۆی زاخۆ 20 کەمپ لە خۆدەگرن، 15 کەمپیان بۆ ئاوارەکانە و 5 کەمپی دیکە بۆ پەنابەرانە. ژمارەی خێزانە نیشتەجێکانی ئەو کەمپانە 20 هەزار و 840 خێزانە، لە کاتێکدا نزیکەی 35 هەزار خێزانی ئاوارە هێشتا لە دەرەوەی کەمپەکان دەژین.