لە حەلەب گرژی لە نێوان هەسەدە و سوپای سووریا سەرهەڵدەداتەوە

ئاڤا نیوز

شەوی ڕابردوو جارێکی دیکە لە ڕۆژهەڵاتی حەلەب لە باکووری سووریا، گرژی لە نێوان هەسەدە و سوپای سووریا سەریهەڵدایەوە و هەردوولاش یەکتری بە دەستپێکی هێرشەکە تۆمەتبار دەکەن، بەهۆی پێکدادانەکانیش دوو هاووڵاتی مەدەنی گیانیان لەدەستداوە.

وێنە گەورەکە: هەرچەندە هەسەدە و دیمەشق لەسەر ڕاگرتنی هەموو جۆرە گرژییەک ڕێککەوتوون و بڕیارە هێزەکان تێکەڵ بە یەکتریی ببنەوە، بەڵام بەهۆی جیاوازییەکان لەسەر شێوازیی تێکەڵبوونەوە و کاریگەری لایەنی هەرێمیی و نێودەوڵەتی، شەش مانگ دوای ڕێککەوتنی نێوانیان هێشتا ڕێککەوتنەکە هەر مەرەکەبی سەر کاغەزە و جێبەجێنەکراوە.

ڕاگەیێنراوی فەرمی: بەڕێوەبەرایەتی ڕاگەیاندن و پەیوەندییەکان لە وەزارەتی بەرگری سووریا بڵاویکردەوە، شەوی ڕابردوو هەسەدە لە فڕۆکەخانەی سەربازی جەراحەوە بەسەختی ناوچەکانی دانیشتووانی لە سێ گوندی دەوروبەری ڕۆژهەڵاتی حەلەب لە باکووری سووریا تۆپباران کردووە، لە ئەنجامیشدا دوو هاووڵاتی مەدەنی کوژراون و سێی دیکەش برینداربوون.

ئاماژەی بەوەشکردووە، لە وەڵامدانەوەی تۆپبارانەکەی هەسەدەش، سوپای سووریا سەرچاوەی هێرشەکەی بە ئامانج گرتووەتەوە، بۆ پاراستنی خەڵک مەدەنیش وەزارەتی بەرگری لە بەجێگەیاندنی ئەرکی خۆی درێغی ناکات.

بۆچوونی لایەنی بەرامبەر: لە بەرامبەریشدا ناوەندی ڕاگەیاندنی هێزەکانی سووریای دیموکرات (هەسەدە) دەڵێت، شەوی ڕابردوو هێزەکانیان ڕووبەڕووی هەوڵێکی دزەکردنی چەکداریی و هێرش بوونەتەوە لەناوچەکانی ژێر دەسەڵاتی هێزەکانی دیمەشق و ئەوانیش هەوڵەکەیان شکستپێهێناوە، بۆ دووبارەبوونەوەی هەر پێشێلکارییەکی دیکەش ئەوان ئامادەی ڕووبەڕووبوونەوەن و ئەوەشی دەستپێشخەری دەکات لە تێکدانی ئارامی بەرپرسیار دەبێت.