مەسرور بارزانی: جەخت لە پابەندبوون و بەرزڕاگرتنی بەها گرنگ و بەنرخەكانی شۆڕشی ئەیلوول دەكەینەوە

ئاڤا نیوز

سەرۆكوەزیران مەسرور بارزانی، لە ساڵیانی هەڵگیرسانی شۆڕشی ئەیلوول، پەیامێكی بڵاو كردەوە و تیایدا دەڵێ، بەهۆی خۆڕاگری و ئیرادەی بەهێزی خەڵكی كوردستان و یەكگرتوویی گەلی كوردستان لە شۆڕشی ئەیلوولدا، چەندین دەسكەوتی گرنگ بەدیهاتن كە گرنگترینیان ڕێككەوتننامەی یازدەی ئاداری 1970 و ناچاركرنی ڕژێمی عێراق بوو كە دان بە مافەكانی گەلی كوردستاندا بنێت.

 

پەیامی فەرمی: سەرۆكوەزیران مەسرور بارزانی ڕایگەیاند: ئەمڕۆ بە ڕێز و شكۆوە، یادی شۆڕشی مەزنی ئەیلوول بە ڕێبەرایەتیی ڕابەری نیشتمانیمان جەنابی بارزانیی نەمر دەكەینەوە، كە شۆڕشێكی سەرتاسەریی خەڵكی كوردستان بوو بە هەموو نەتەوە و ئایین وپێكهاتە جیاوازەكانەوە، لەپێناو بەرگریكردن لە مافە نەتەوەیی و نیشتمانییەكانی گەلی كوردستان و وەستانەوە دژی ستەم و داگیركاری.

- بەهۆی خۆڕاگری و ئیرادەی بەهێزی خەڵكی كوردستان و یەكگرتوویی گەلی كوردستان لە شۆڕشی ئەیلوولدا، چەندین دەسكەوتی گرنگ بەدیهاتن كە گرنگترینیان ڕێككەوتننامەی یازدەی ئاداری 1970 و ناچاركرنی ڕژێمی عێراق بوو كە دان بە مافەكانی گەلی كوردستاندا بنێت.

- لە (64)مین ساڵیادی شۆڕشی مەزنی ئەیلوولدا، جەخت لە پابەندبوون و بەرزڕاگرتنی بەها گرنگ و بەنرخەكانی شۆڕشی ئەیلوول دەكەینەوە لە یەكگرتوویی و تەبایی هەموو پێكهاتە و چین و توێژەكانی گەلی كوردستان لەپێناو داكۆكیكردن لە ماف و دەسكەوتە نیشتمانییەكانمان و پاراستنی قەوارەی دەستووریی هەرێمی كوردستان.

- پیرۆز بێت یادی شۆڕشی مەزنی ئەیلوول، سڵاو لە گیانی پاكی شەهیدانی شۆڕشی ئەیلوول و گشت شەهیدانی كوردستان.