سەرۆک بارزانی: شۆڕشی ئەیلوول بۆ قۆناغەكانی تری خەباتی گەلی كوردستان سەرچاوەی هێز و ئیلهام بووە

ئاڤا نیوز

سەرۆک بارزانی پەیامێکی بەبۆنەی یادی شەست و چوار ساڵەی هەڵگیرسانی شۆڕشی ئەیلوول بڵاوکردەوە و تیایدا هاتووە: ئەم شۆڕشە بە ڕابەرایەتیی بارزانیی نەمر بۆیەکەمین جار لە مێژوودا بناغەیەکی پتەوی بۆ تێکۆشان و خەباتی هاوبەشی ناوچە جیاجیاکانی کوردستان دانا، بۆ قۆناغەکانی تری خەباتی گەلی کوردستانیش سەرچاوەی هێز و ئیلهام بووە.

پەیامی فەرمی: سەرۆک بارزانی لە یادی شەست و چوار ساڵەی هەڵگیرساندنی شۆڕشی ئەیلوول پەیامێکی بلاوکردەوە و تێیدا هاتووە: شۆڕشی ئەیلوول لاپەڕەیەکی زێڕینی بزووتنەوەی ڕزگاریخوازی کوردستان و گەورەترین شۆڕشی سەرتاسەریی سیاسی و چەکداری و جەماوەریی کوردستان بوو کە هانی خەڵکی کوردستانی دا بە هێز و بڕوابەخۆبوونەوە بەرەو ئامانجی نوێ و ئاسۆیەکی بەرفراوان هەنگاو بنێن و لە ئەنجامدا دۆزی گەلی کوردستان قۆناغی گەورە ببڕێت.

-     ئەم شۆڕشە بە ڕابەرایەتیی بارزانیی نەمر بۆ یەکەمین جار لە مێژوودا بناخەیەکی پتەوی بۆ تێکۆشان و خەباتی هاوبەشی ناوچە جیاجیاکانی کوردستان و گشت چینوتوێژەکان و پێکهاتەکانی کوردستان دانا، ئەویش لەپێناو بەرگریکردن لە دۆزی ڕەوا و مافەکانی خەڵکی کوردستان.

-     شۆڕشی ئەیلوول بۆ قۆناغەکانی تری خەباتی گەلی کوردستان سەرچاوەی هێز و ئیلهام بووە و، ئەزموون و دەستکەوتەکانی ئەو شۆڕشە مەزنە بۆ هەمیشە بەرچاوڕوونی دەداتە خەبات و تێکۆشانی گەلی کوردستان.

-    لە یادی شەست و چوار ساڵەی هەڵگیرساندنی شۆڕشی ئەیلوولدا دەستخۆشی و پێزانینم بۆ هەموو ئەو کادیر و پێشمەرگە و خەباتگێڕانە هەیە کە بە پێداگری و بوێری و ماندوویەتیی خۆیان مێژوو و شانازییان بۆ گەلەکەیان تۆمار کردووە. هەر لەم یادەدا هەزاران سڵاو بۆ شەهیدانی شۆڕشی ئەیلوول و سەرجەم شەهیدانی ڕێگەی ئازادیی کوردستان دەنێرین.