ئەو بریکارانەی بەشێوەی ناڕێک بەشەخۆراکی هاووڵاتییان هەڵدەگرن سزا دەدرێن

ئاڤا نیوز

لیژنەی بەدواداچوون و چاودێریکردن لە بەڕێوەبەرایەتیی ڕێکخستنی پسوولەی خۆراکی هەولێر، بەشێوەیەکی بەردەوام سەردانی بریکارەکانی دابەشکردنی خۆراک دەکەن، سەرپێچیکاران سزا دەدەن.

چیرۆکی سەرەکی: بەشێکی بریکارەکانی دابەشکردنی خۆراک کۆگاکانیان لەڕووی تەندروستییەوە پێچەوانەی ڕێنماییەکانە، لەلایەن تیمەکانی چاودێری بەسەر دەکرێنەوە و ڕێنماییان پێدەدرێت، لە ئەگەری پێشێلکاری سزا دەدرێن.

لێدوانی فەرمی: سیامەند قادر نانەكەلی، بەڕێوەبەری ڕێكخستنی پسوولەی خۆراكی هەولێر؛ بە ئاڤای گوت، "هەر بریکارێک سەرپێچی ڕێنماییەکان بکات، سزای دارایی دەدرێت، کە لە 50 هەزارەوە دەست پێدەکات تاوەکو نزیکەی دوو ملیۆن دینار."

ئەمەش بزانە: بەشێکی بریکارەکان بەهۆی نەبوونی هەواگۆڕکێ، پیسی کۆگاکانیان یان وەرگرتنی پارەی زیاد لە هاووڵاتیان نزیکەی 500 هەزار دینار سزا دراون، هەروەها بەگوێرەی ڕێنماییەکان ئەو شوێنەی بەشە خۆراکەکەی لێ دابنرێت پێویستە ڕێک بێت و بەشە خۆراکەکە پیس نەکات.