یەکی نیسان ڕۆژی درۆی سپییە

ئاڤا نیوز

 

ساڵانە یەکەم ڕۆژی مانگی نیسان، لە جیهان، وەک ڕۆژی درۆی سپی، یاد دەکرێتەوە، ئەم ڕۆژە بە ڕۆژی درۆی نیسان یان ڕۆژی گەمژەی نیسان ناودەبرێت. 

 

 وێنە گەورەکە: لەم ڕۆژەدا هاوڕێیان لەنێوان خۆیاندا بۆ مەبەستی خۆشی و گاڵتەکردن درۆیەک دەکەن تاوەکو بزانن کێ باوەڕیان پێدەکات، نەریتەکە بەو شێوەیە کە دەبێت دواتر ئەو کەسەی درۆکەی کردووە، درۆکە ئاشکرا بکات و ڕاستییەکەی بڵێت. ئەوەشی باوەڕی بە درۆکە کردبێت بە 'گەمژەی نیسان' ناودەبرێت.

 

ئەوەی لەبارەیەوە دەگوترێت: سەبارەت بە سەرەتاکانی سەرهەڵدانی ئەم ڕۆژە گریمانەی جیاواز هەن؛ یەک لەوانە بەم جۆرەیە کە گوایە: شارڵی نۆیەم، پادشای فەرەنسا، لە ساڵی 1564 ڕۆژژمێری گریگۆری هەموار دەکاتەوە و بۆنەکانی ساڵی نوێ لە یەکی نیسانەوە بۆ یەکی کانوونی دووەم دەگوازێتەوە، بەڵام کەسانێک کە لە دژی بڕیارەکە بوون هەر لە یەکی نیساندا بۆنەکانیان یاد دەکردنەوە و دەچوونە سەردانی هاوڕێیان و خزمانیان و بەمجۆرە ئەوانیان تووشی سەرسوڕمان دەکرد.

 

ئەوەی پێویستە بیزانیت: مەبەست لە درۆی نیسان دەرفەتێکە بۆ خۆشی و ڕابواردن تاوەکو بزانن کێ ئەوەندە خۆشباوەڕە باوەڕ بەو جۆرە درۆیانە دەکات. چونکە ئەو درۆیانەی کە لەو ڕۆژەدا دەکرێن دەبێت زۆر گەورە و شاخدار بن.

 

گۆشەیەکی دیکە: یەکی نیسانی ئەمساڵ لە مانگی ڕەمەزانی پیرۆزدایە و چاوەڕێ دەکرێت تەنانەت بۆ خۆشی و گاڵتەوگەپیش لەم ڕۆژەدا ئەو درۆیانە نەکرێن، تاوەکو نەبنە هۆی ئازاردانی کەس و گوناهباربوونی کەسەکە.

 

باکگراوند: زۆرجار میدیاکان و تەنانەت دامەزراوە فەرمییەکانیش بۆ گاڵتەکردن درۆی نیسانیان کردووە؛ ئەمەش چەند نموونەیەک:
-    ساڵی 1950 کەناڵی تەلەڤیزیۆنی هۆڵەندا هەواڵی کەوتنی بورجی پیتزای بڵاوکردەوە.
-    ساڵی 2015 سێرگی لاڤرۆڤ ڕایگەیاند، ڕێککەوتنی ئەتۆمیی گشتگیر لەگەڵ ئێران کراوە.