سەرۆکوەزیران مەسرور بارزانی و شاندی دەوڵەتی ئیمارات جەخت لەسەر گرنگی پەیوەندی هەردوولا دەکەنەوە

ئاڤا نیوز

سەرۆکوەزیران مەسرور بارزانی پێشوازی له‌ سه‌عيد موبارەك ئه‌لهاجەرى، وه‌زيرى ده‌وڵه‌ت و نێرده‌ى تايبه‌تى ئيمارات بۆ كاروبارى ئابوورى بۆ هه‌رێمى كوردستان و شاندێكى ياوه‌رى كرد، پەیوەندیی دۆستانە و تایبەتیی نێوان هەرێمی کوردستان و دەوڵەتی ئیمارات دووپات کرایەوە.

ڕاگەیێنراوی فەرمی: ماڵپەری حکومەتی هەرێمی کوردستان، ڕایگەیاند، لەمیانی کۆبوونەوەی هەردوولا سەرۆکوەزیران مەسرور بارزانی، ئاماژەی بە گرنگیی پەیوەندیی دۆستانە و تایبەتیی نێوان هەرێمی کوردستان و دەوڵەتی ئیمارات کرد و سوپاسی شێخ محەمەد بن زاید، سەرۆکی ئیماراتی کرد بۆ پشتیوانیی و هاریکاریکردنی هەرێمی کوردستان و ده‌ستنيشانكردنى نێرده‌يه‌كى تايبه‌تى ئيماراتى بۆ كاروبارى ئابوورى بۆ هه‌رێمى كوردستان، کە نیشانەی گرنگیی و بەهێزیی پەیوەندیی دوولایەنەیە.

سەرۆکی حکومەت هەروەها سڵاو و ڕێزی خۆی بۆ شێخ محەمەد بن ڕاشد جێگری سەرۆکی ئیمارات بە شاندەکە گەیاند.

لەلایەکی دیکەوە: سەعید ئەلهاجەری خواستی وڵاتەکەی بۆ پەرەپێدانی زیاتری پەیوەندییەکان لەگەڵ هەرێمی کوردستان لە هەموو بوارەکاندا دەربڕی و ئاماژەی بەوەدا کە هەرێمی کوردستان، پێگەیەکی گرنگ و تایبەتیی لای سەرکردایەتیی ئیمارات هەیە و جەختیشی کردەوە کە دەرفەتی زۆر بۆ بەهێزترکردنی پەیوەندیی دوولایەنە لە بوارە جۆراوجۆرەکاندا هەیە .