وەزارەتی دەرەوەی عێراق پێشوازی لە بڕیارێکی ئەمریکا دەکات

ئاڤا نیوز

وەزارەتی دەرەوەی عێراق، هەڵوەشاندنەوەی مۆڵەتی جەنگی لەلایەن کۆنگرێسی ئەمریکاوە بە هەنگاوێک بۆ پتەوکردنی پەیوەندییەکانی لەگەڵ واشنتن و چەسپاندنی بنەمای رێزگرتن لە سەروەری خاکی عێراق وەسف کرد.

چیرۆکی سەرەکی: لە نوێترین هەوڵی کۆنگرێسی ئەمریکا بۆ سەندنەوەی دەسەڵاتی سەرۆک لە دەستپێکردنی جەنگەکان، ئەنجوومەنی نوێنەرانی ئەمریکا پاساوی یاسایی بۆ هێرشکردنە سەر عێراق کە لە ساڵانی 1991 و 2003 بەکارهاتبوون هەڵوەشاندەوە، ئەم جوڵەیە دوای بڕیارەکانی ترەمپ بۆ بۆردومانکردنی دامەزراوە ئەتۆمییەکانی ئێران و لێدانی بەلەمێک کە گوایە ماددە هۆشبەرە نایاساییەکانی لە کاریبی دەگواستەوە هات.

لێدوانی فەرمی: هیشام عەلەوی، بریکاری وەزارەتی دەرەوەی عێراق رایگەیاند: دەنگدانی کۆنگرێسی ئەمریکا بۆ هەڵوەشاندنەوەی مۆڵەتی جەنگ لە دژی عێراق، هەڵوەشاندنەوەی یاسا کۆنەکانە کە مۆڵەتی فراوانیان بە هەردوو سەرۆکی ئەمریکا جۆرج بوش باوک لە ساڵی 1991 و جۆرج بوش کوڕ لە 2002) بۆ دەستپێکردنی جەنگ لە دژی عێراق بەبێ گەڕانەوە بۆ کۆنگرێس دابوو.

زانیاریی زیاتر: عەلەوی ئاماژەی بەوەکرد، بڕیارەکە هەنگاوێکە بۆ باشترکردنی پەیوەندییەکانی نێوان هەردوو وڵات دەربڕینی نیەت پاکییە لەلایەن ئەمریکاوە کە چیتر ئەو وڵاتە لە دۆخی جەنگدا لەگەڵ عێراق نییە.