گرفتی كەمی كارمەندی نەخۆشخانە و بنكە تەندروستییەكان گەیێنراوەتە بەغدا

ئاڤا نیوز

وەزیری تەندروستیی هەرێمی كوردستان ڕایدەگەیەنێت، داوایان لە حكومەتی فیدراڵ كردووە، لە دامەزراندنی دەرچووانی پزیشكی بەپێی یاسای بودجەی گشتیی فیدراڵی، پشكی هەرێمی كوردستانیش لەبەرچاو بگیرێت و پلەی وەزیفی پێویست بۆ سێكتەری تەندروستی دابین بكرێت.

وێنە گەورەكە: دوای پەیڕەوكردنی یاسای نوێی خانەنشینی یەكگرتوو ژمارە 9ـی ساڵی 2014، تەنها ئەمساڵ سێ هەزار كارمەند و پزیشک لەسەر میلاكی وەزارەتی تەندروستی خانەنشین بوون، جگە لەوەش ژمارەیەكی زۆری پزیشكان و كارمەندانی تەندروستی، دابڕانیان هەیە و مۆڵەتی درێژخایەنی بێ مووچەیان كردووە، ئەوەش كەلێنێكی گەورەی لە میلاكی وەزارەتەكە دروستكردووە و زۆربەی نەخۆشخانە و بنكە تەندروستییەكان بەدەست كەمی كارمەندەوە دەناڵێنن.

لێدوانی فەرمی: د. سامان بەرزنجی، وەزیری تەندروستیی هەرێمی كوردستان لە كۆنفرانسێكی ڕۆژنامەوانی ڕایگەیاند، حكومەتی هەرێمی كوردستان هەوڵەكانی چڕكردووەتەوە بۆ دامەزراندنی دەرچووانی كۆلێژە پزیشكییەكان و لەگەڵ حكومەتی فیدراڵ لەسەر هێڵە بۆ ئەو پرسە.

زانیاریی زیاتر: وەزیری تەندروستی ڕوونیشی كردەوە، یاسای بودجەی گشتی، دامەزراندنی پلەی وەزیفی لەخۆدەگرێت، پێویستە حكومەتی فیدراڵ چۆن دەرچووانی پزیشكی لە ناوچەكانی دیكەی عێراق دادەمەزرێنێت، بە هەمان شێوە پشكی هەرێمی كوردستان لەبەرچاو بگرێت.