لاریجانی داوایەک لە وڵاتانی ئیسلامی دەکات

ئاڤا نیوز

عەلی لاریجانی، ئەمینداری ئەنجوومەنی باڵای ئاسایشی نیشتمانیی ئێران، لووتکەی وڵاتانی ئیسلامی سەبارەت بە فەڵەستین "بێ کردەوە ناودەبات" و داوا دەکات ژوورێکی ئۆپەراسیۆنی هاوبەش دژی ئیسرائیل پێکبهێنرێت.

 

وێنە گەورەکە: بڕیارە ڕۆژی یەکشەممە و دووشەممەی ئەم هەفتەیە،  لووتکەی بەپەلەی هاوبەشی ڕێکخراوانی هاوکاریی ئیسلامی و کۆمکاری عەرەبی لە قەتەر بەڕێوەدەچێت، بۆ تاوتوێ کردنی هێرشەکەی ئیسرائیل بۆ سەر قەتەر لە هەفتەی ڕابردوودا.

 

ڕاگەیێنراوی فەرمی: عەلی لاریجانی، پۆستێکی لە هەژماری خۆی لە فەیسبووک بە ناونیشانی " هۆشدارییەک بۆ حکومەتە ئیسلامییەکان" بڵاو کردووەتەوە و تێیدا هاتووە، سازدانی کۆنفرانسی هاوکاریی ئیسلامی پڕ لە قسە و گوتار و بێ دەرئەنجامی کردەیی، وەک چۆن لە کۆبوونەوەکانی ئەنجوومەنی ئاسایشدا هەیە کە یەکسانە بە دەرکردنی فەرمانێکی نوێ بۆ هێرشکردن لە بەرژەوەندیی قەوارەی زایۆنی".

 

دەشڵێ: لانیكەم ژوورێکی ئۆپەراسیۆنی هاوبەش لە دژی شێتیی ئەم قەوارەیە پێكبهێنن ئەم بڕیارە بە تەنیا بەسە بۆ ئەوەی ئاغاكانی ئەم قەوارەیە نیگەران بكات و هانیان بدات بەپەلە فەرمانەكانیان بگۆڕن ئەمەش بە بیانووی گەیشتن بە ئاشتیی جیهانی و خەڵاتی نۆبڵ." 

 

لەلایەکی دیکە: لاریجانی ڕەخنە لە وڵاتانی ئیسلامی دەگرێت و دەڵێت، بەو پێیەی ئێوە هیچتان بۆ موسڵمانە برسی و چەوساوەکانی فەڵەستین نەکردووە، لانیکەم بڕیارێکی سادە بدەن بۆ ئەوەی خۆتان لە لەناوچوون بەدوور بگرن.