ئۆجەلان پەیامێک ئاراستەی سەرۆک هۆزە عەرەبییەکان دەکات

ئاڤا نیوز

ڕێبەری زیندانیکراوی پەکەکە، پەیامێک ئاراستەی سەرۆک هۆزە عەرەبییەکان لە سووریا دەکات، بڕیارە لە ڕێگەی دەستپێشخەری سووریا بۆ ئازادی عەبدوڵڵا ئۆجەلان بگەیەنرێتە دەستیان.

وێنە گەورەکە: ڕۆژی 15-2-1999، عەبدوڵڵا ئۆجەلان، ڕێبەری پەکەکە لە وڵاتی کینیا لە ئۆپەراسیۆنێکی هاوبەشی دەزگای هەواڵگریی ئەمریکا و تورکیا و ئیسرائیل دەستگیر کرا، دوای ئەوە ئۆجەلان گواسترایەوە بۆ تورکیا و لە زیندانێکی تاکەکەسی لە دوورگەی ئیمرالی لە دەریای مەڕمەڕە لە تورکیا ڕاگیرا تاوەکو ئێستا.

لێدوانی فەرمی: فەرزەندە مونزیر، ئەندامی ئیدارەی دەستپێشخەریی سووریا بۆ ئازادی عەبدوڵڵا ئۆجەلان، کە قسەی بۆ میدیای نزیک لە پەکەکە کردووە، ڕایگەیاند، عەبدوڵڵا ئۆجەلان پەیامێکی بۆ گەورە و سەرۆک هۆزە عەرەبییەکانی سووریا ناردووە.

بەگوتەی فەرزەندە مونزیر: "پەیامەکەی عەبدوڵڵا ئۆجالان گەیشتووەتە دەستپێشخەری سووریا بۆ ئازادی عەبدوڵڵا ئۆجالان، بڕیارە بە زوویی بگەیەنرێتە دەستی گەورە و سەرۆک هۆزەکان و بۆ ڕای گشتی ڕابگەیەنرێت."

ئیدارەی دەستپێشخەریی سووریا بۆ ئازادی عەبدوڵڵا ئۆجەلان ناوەڕۆکی پەیامەکەی ئاشکرا نەکردووە.