کچێکی فەڵەستینی بەشداری پێشبڕکێی شاجوانی گەردوون دەکات

ئاڤا نیوز

کچێکی فەڵەستینی خۆی بۆ شاجوانی گەردوون کاندید دەکات و جەخت لەوە دەکاتەوە لە ڕێگەی ئەم پێشبڕکێیەوە دەیەوێت نیشانی جیهانیی بدات کە فەڵەستینییەکانیش خەون و ئاواتیان هەیە. 

وێنە گەورەکە: 23 مانگە شەڕ لە کەرتی غەززە لە نێوان ئیسرائیل و حەماس بەردەوامە و ڕۆژانەش ئیسرائیل هێرشی چڕ بۆ سەر کەرتەکە ئەنجام دەدات و قوربانیی هەیە.

زانیاریی بەدەستهاتوو: نادین ئەیوب، یەکەم فەڵەستینییە کە بەشداریی پێشبڕکێی شاجوانی گەردوون دەکات، لە چاوپێکەوتنێکدا لەگەڵ ئاژانسی فرانس پرێس ڕایگەیاند، دەیەوێت پەیامێک بۆ جیهان بنێرێت کە فەڵەستینیەکان تەنیا گەلێکی ئازارچەشتوو نین، بەڵکو خەون و ئاوات و ناسنامەیەکیان هەیە کە پێیەوە دەلکێن.

زانیاریی زیاتر: نادین ئاشکرای کرد، لە دەرەوەی وڵات گەورە بووە و ئێستا بەپێی هەلومەرجەکانی لە ڕامەڵڵا و عومان و دوبەی ژیان بەسەر دەبات، خاوەنی بڕوانامەی ئەدەبی ئینگلیزی و دەروونناسییە. لە ناوچەکانی فەڵەستین وانە دەڵێتەوە و لەگەڵ ڕێکخراوە مرۆییەکان کاردەکات، ئاشکراشی دەکات دوای ئەوەی لە نمایشێکی جلوبەرگدا لە ئیتاڵیا کاری مۆدێلی کردووە هانیانداوە بیر لە پێشبڕکێییەکی لەم شێوەیە بکاتەوە، بۆیە دەڵێت دەمەوێت لە پشتیوانیکردنی ژنان و منداڵان و گەلی فەڵەستین بەردەوام بم.

باکگراوند: شاجوانی گەردوون بۆ ساڵی2025 ، 74ـەمین خولی پێشبڕکێی خۆی ئەنجام دەدات و بڕیارە لە 2025-11-21 لە تایلاند ئەم مەراسیمە بکرێت.