وڵاتان لە دژی ئیسرائیل لە یۆرۆڤیژنی 2026 دەکشێنەوە

ئاڤا نیوز

هەریەک لە ئیرلەندا و هۆڵەندا ڕایانگەیاند، ئەگەر ئیسرائیل لە پێشبڕکێی گۆرانی یۆرۆڤیژن 2026 بەشداری بکات، ئەوان دەکشێنەوە. 

ڕاگەیێنراوی فەرمی: میدیای فەرمیی ئەو وڵاتانە ڕایانگەیاندووە بەشداریی ئیسرائیل لەم پێشبڕکێیەدا، لە کاتێکدا کە غەززە زیانێکی زۆری مرۆیی بەخۆیەوە دەبینێت، جێگەی قبوڵکردن نییە.

زانیاریی زیاتر: ڕاگەیەندراوەکە نیگەرانی قووڵی دەربڕیوە سەبارەت بە پێشێلکارییە جددیەکانی ئازادی میدیا، لەوانەش ڕێگریکردن لە ڕۆژنامەنووسانی سەربەخۆی نێودەوڵەتی و کوشتنی بە ئەنقەستی ژمارەیەکی زۆر لە ڕۆژنامەنووسان لەلایەن ئیسرائیلەوە لە کەرتی غەززە.

ئەمەش بزانە: پێشتر ئیسپانیاش هەڵوێستێکی هاوشێوەی ئەمەی ئیرلەندا و هۆڵەندا ڕاگەیاندبوو و چاوەڕێ دەکرێت ژمارەیەک دەوڵەتی دیکە هەمان هەڵوێست بنوێنن. ئیسپانیا ڕایگەیاندبووە "ڕەخنەگرتن لەوەی لە غەززە ڕوو دەدات دژایەتیکردنی جولەکە نییە، بەڵکو سەرکۆنەکردنی جینۆسایدە. ئیسرائیل دەوڵەتێکی جینۆسایدکەرە."

باکگراوند: یۆرۆڤیژن پێشبڕکێیەکی تایبەت بە گۆرانی و میوزیکە کە ساڵانە لە نێوان وڵاتانی ئەوروپا بەڕێوە دەچێت. هەرچەندە ئیسرائیل لە ئەوروپا نییە، بەڵام وەک ئەندام بەشداریی تێدا دەکات.