بڕیارێکی عێراق سەبارەت بە هاوردەکردنی ئامێرە کارەباییەکان هەرێمی کوردستانیش دەگرێتەوە

ئاڤا نیوز

وەزارەتی پلاندانانی عێراق ڕایدەگەیێنێت، دەست بە جێبەجێکردنی ڕێوشوێنی نوێ دەکات بۆ کۆنترۆڵکردنی کوالێتی ئامێرە کارەباییە هاوردەکراوەکان و جەختی کردەوە ڕێگە بە هیچ کاڵایەک نادرێت بێتە ناو وڵاتەوە کە بارکۆدی تایبەت بە کوالیتی عێراقی پێنەبێت.

بۆچی گرنگە؟: ئەم بڕیارە کاریگەریی لەسەر پاراستنی سەلامەتی و تەندروستی هاووڵاتیان دەبێت لە بەکارهێنانی کاڵای کوالێتی نزم و مەترسیدار. هاوکات، گەرەنتیکردنی کوالیتی بەرهەمە هاوردەکراوەکان و پاراستنی مافی بەکاربەر لە بەرامبەر کاڵای خراپ و کەمکردنەوەی بەفیڕۆدانی وزە و هاندانی بەکارهێنانی ئامێری کارەبایی کارامەتر.

لێدوانی فەرمی: عەبدولزەهرە هیندای، وتەبێژی وەزارەتی پلاندانان، بە ئاژانسی هەواڵی عێراقی ڕاگەیاند: "پێویستە ئامێرە کارەباییە بەگوێرەی کۆمەڵێک پێوەری پەسەندکراوی دەزگای ناوەندی ستانداردکردن و کۆنترۆڵی کوالێتی هاوردە بکرێن، ئەمەش بۆ دڵنیابوون لەوەی کە لەگەڵ تایبەتمەندییە ستانداردە عێراقی و نێودەوڵەتییەکاندا یەکدەگرنەوە." 

لەهەمان کاتدا: هینداوی وتیشی: "ئامێرە کارەباییەکان بریتین لە گەرمکەرەوەی ئاوی ناوماڵ، گەرمکەرەوە کارەباییەکان، ئامێرەکانی ساردکەرەوەکان، فێنککەرەوەی هەوا و فڕنە کارەباییەکان".

شێوازی جێبەجێکردن: بە وتەی وتەبێژەکەی وەزارەتی پلاندانان "هەڵگرتنی نیشانەی کوالیتی عێراقی لەسەر ئەم ئامێرانە لە 1ی تەمموزی 2024ـەوە بووەتە ناچاری، و لە 15ی ئەیلوولی ئەمساڵەوە بوونی بارکۆد کە نیشانەکە دەسەلمێنێت، دەبێتە ناچاری." هاوکات "سیستەمی بەدواداچوون (ئەسیکودا) بووەتە مەرجێکی پێشوەختە بۆ پشکنینی ئامێرە کارەباییەکان و جگەرە، جگە لە ناچاریی گونجاندنی ئامێرەکان لەگەڵ تایبەتمەندییە تەکنیکییەکان و پێوەرەکانی سەلامەتی عێراقی کە پشت بە پێوەرە نێودەوڵەتییەکان دەبەستن."

ئەوەی پێویستە بیزانیت: بەگوێرەی نووسراوێکی وەزارەتی پلاندانانی عێراق کە ئاراستەی ئەنجوومەنی وەزیران و نوێنەرایەتیی حکومەتی هەرێمی کوردستانی کردووە لە بەغدا، بڕیارەکە هەرێمی کوردستانیش دەگرێتەوە.