زیاتر لە 230 گرێبەست لە پێشانگەی نێودەوڵەتی خانووبەرە کران

ئاڤا نیوز

لە ماوەی چوار ڕۆژی شەشەمین پێشانگەی نێودەوڵەتی وەبەرهێنانی خانووبەرە لە هەولێر زیاتر لە 230 گرێبەستی کڕین و فرۆشتن کران و زیاتر لە هەزار بازرگانیش سەردانی پێشانگاکەیان کردووە.

چیرۆکی سەرەکی: ڕۆژی سێشەممە 2025-09-09، بە بەشداری 280 کۆمپانیا لە 16 وڵاتی جیهانەوە، شەشەمین پێشانگەی نێودەوڵەتیی بۆ وەبەرهێنانی خانووبەرە لە هەولێر کرایەوە و ماوەی چوار ڕۆژ بەردەوام بوو.

ژمارەکان وادەڵێن: ئاماری چوار ڕۆژی پێشانگەکە بەمشێوەیە بوو:

٠ 22 هەزار کەس سەردانی پێشانگەکەیان کردووە

٠ زیاتر لە هەزار بازرگان سەردانی پێشانگەکەیان کردووە

٠ زیاتر لە هەزار هەلی کار ڕاگەیێنرا

٠ زیاتر لە 230 گرێبەستی کڕین و فرۆشتن کران

لێدوانی فەرمی: هۆرە سامان، گوتەبێژی شەشەمین پێشانگەی نێودەوڵەتی وەبەرهێنانی خانووبەرە لە هەولێر، بە ئاڤا میدیای گوت: هەڵسەنگاندنی کۆمپانیا بەشداربووەکان دەربارەی گرێبەست و دیدار و چاوپێکەوتنیان لەگەڵ بازرگان و سەردانیکاران زۆرباش بوو، بەتایبەت ئەو کۆمپانیایانەی لە دەرەوەی هەرێمی کوردستان بەشدارییان کردبوو.

باکگراوند: پێشانگەی نێودەوڵەتی ئەمساڵی وەبەرهێنانی خانووبەرە بەراورد بە ساڵی ڕابردوو زۆر سەرکەوتووتر بوو، چونکە ژمارەی بەشداربووان و گرێبەست و سەردانیکاران زیاتر بوو،

ژمارەکانی ساڵی ڕابردوو بەمجۆرە بوون:

٠ ژمارەی سەردانیکاران : 18 هەزار کەس

٠ ژمارەی گرێبەستی کڕین و فرۆشتن : 180 گرێبەست

٠ کۆمپانیا بەشداربووەکان : 260 کۆمپانیا

٠ وڵاتانی بەشدار: 15 وڵات

٠ زیاتر لە هەزار بازرگان سەردانیان کردبوو

٠ هەزار هەلی کاری ڕاگەیێنرابوون