ڕوانگەی سووری ئاماری نوێ کوژراوانی شەڕی سوەیدا لە سووریا بڵاو دەکاتەوە

ئاڤا نیوز

دوای دۆزینەوەی چەند تەرمێکی دیکەی هاووڵاتییانی دروز لە شاری سوەیدا لە سووریا، ڕوانگەی سووری بۆ مافەکانی مرۆڤ ئاشکرای کرد، هەزار و 583 هاووڵاتیی دروز کوژراون کە 808 ـین گوللەباران کراون لە شەڕی نێوان چەکدارانی ئەو پێکهاتەیە لەگەڵ خێڵە بەدەوییەکان و چەکدارانی سەر بە حکومەت.

چیرۆکی سەرەکی: لە ماوەی ڕابردوودا، شەڕ و پێکدادان لەنێوان خێڵە بەدەوییە عەرەبییەکان و هێزەکانی سەر بە سوپای سووریا لەگەڵ چەکدارانی پێکهاتەی دروز لە پارێزگای سوەیدا ڕووی دا و دواتر ئیسرائیل چەکدارانی حکومەتی بۆردوومانکرد و شەڕەکە چەند ڕۆژێک بەردەوام بوو، لە ئەنجامدا بە گوێرەی ڕوانگەی سووری دوو هەزار و 38 کەس کە زۆربەیان خەڵکی مەدەنی بوون گیانیان لەدەستدا.

ڕاگەیێنراوی فەرمی: لە ڕاگەیێنراوێکدا ڕوانگەکە ڕایگەیاند: لەگەڵ بەردەوامی گەڕان و لێکۆڵینەوەکان، پێدەچێت ژمارەی کوژراوان بەرزبێتەوە، چونکە بێسەروشوێنبوون لە هەمان ڕووداو هەن کە چارەنووسیان نادیارە.

زانیاریی زیاتر:  مانگی سوور تەرمی حەوت کەسی لە گوندێک لە دەوروبەری سوەیدا دۆزیەوە کە پیرە پیاوێک و هاوسەری و پێنج منداڵ بوون.