شیاندنەوە بۆ بەکارهێنەرانی ماددە هۆشبەرەکان بەردەوامە

ئاڤا نیوز

شیاندنەوە بۆ بەکارهێنەرانی ماددە هۆشبەرەکان بەردەوامە و لەگەڵ ئەوەشدا سیمیناری تایبەت بە ڕووبەڕووبوونەوەی ماددە هۆشبەرەکان ساز دەکرێن.

چیرۆکی سەرەکی: ئەمشەو ماڵی وەفایی لە هەولێر، سیمینارێکی تایبەت بە مەترسییەکانی ماددە هۆشبەرەکان لە هەرێمی کوردستان بۆ "نەقیب ئەرکان بیبانی" بەرپرسی ڕاگەیاندنی بەڕیوەبەرایەتیی گشتیی نەهێشتنی ماددە هۆشبەرەکان ساز دەکات.

لێدوانی فەرمی: نەقیب ئەرکان بیبانی، بەرپرسی ڕاگەیاندنی بەڕێوەبەرایەتیی گشتیی نەهێشتنی ماددە هۆشبەرەکان بە ئاڤای ڕاگەیاند: سیمینارەکەمان لە چوارچێوەی ئەو هەڵمەتە نیشتمانییەیە کە بۆ بەرەنگاربوونەوەی ماددە هۆشبەرەکان دەکرێت، ئەمە بۆ هۆشیارکردنەوەی کۆمەڵگەیە و سیمینارەکانمان لە ناوەندەکانی خوێندن و گشت چیب و توێژینەوەکان بەردەوامە، تەنانەت لە شوێنە نافەرمییەکان و کۆمپانیاکان سیمیناری لەم شێوەیە ڕێک دەخەین.

ئەوەی پێویستە بیزانیت: لە ماوەی ڕابردوو زیاتر لە 700 بەکارهێنەری ماددە هۆشبەرەکان شیاندنەوەیان بۆ کراوە، بەمەش وازیان لە تەواوی ماددە هۆشبەرەکان هێناوە.

گۆشەیەکی دیکەی دیمەنەکە: لە حەوت مانگی یەکەمی ئەمساڵ، 949 تۆمەتباری بەکارهێنەری ماددە هۆشبەرەکان دەستگیرکراون، کە 409 بەکارهێنەر و 540 بازرگان بوون. زیاتر لە 453 کیلۆگرام ماددەی هۆشبەر دەستی بەسەردا گیراوە، لەگەڵ 70 کیلۆگرام حەبی کەپتاگۆن و هەشت هەزار و 505 شیت حەبی جۆراوجۆر.

ئەمەش بزانە: بەڕێوەبەرایەتیی گشتیی ماددە هۆشبەرەکان بەرچاوڕوونی بە هاونیشتمانیان دەدات تاوەکو خۆیان لە ماددە هۆشبەرەکان بەدوور بگرن، هەروەها هەر ئالوودەبوویەک دەستپێشخەری بکات و بیەوێت خۆی چارەسەر بکات، ئەوا دەستگیر ناکرێت و بە تاوانباریش هەژمار ناکرێت، چونکە ئامادەیی خۆی بۆ شیاندنەوە نیشان داوە.

باکگراوند: لە ساڵی ڕابردوو هەزار و 568 تۆمەتباری ماددە هۆشبەرەکان دەستگیرکراون، 737 بەکارهێنەر و 831 بازرگان بوون، زیاتر لە 466 کیلۆگرام ماددەی هۆشبەر دەستی بەسەرداگیراوە، لەگەڵ 30 هەزار و 240 شیت حەبی جۆراوجۆر.