جادووگەرێک فێڵ لە گەنجێک دەکات، پارەی دەخوات و ڤیدیۆیشی بڵاو دەکاتەوە

ئاڤا نیوز

گەنجێک، بەهۆی باوەڕکردن بە قسەکانی کەسێک کە خۆی وەک "جادووگەر" و "نووشتەچی" ناساندووە، تووشی زیانێکی گەورەی ماددی و مەعنەوی بووە. ئەم گەنجە، کە نەیویست ناوی ئاشکرا بکرێت، چیرۆکی خۆی بۆ ئاڤا گێڕایەوە تا خەڵکی دیکە تووشی هەمان چارەنووس نەبن.

چیرۆکی سەرەکی: گەنجەکە دڵی بە کچێکەوە بووە و ویستوویەتی بە شێوەیەکی یاسایی بچێتە داوای و بیکاتە هاوسەری خۆی، بەڵام هەوڵەکانی سەرکەوتوو نەبوون. لەم نێوەندەدا، لە تۆڕی کۆمەڵایەتی تیکتۆک کەسێک دەبینێت کە بانگەشەی نووشتەکردن و چارەسەرکردنی کێشەکانی خۆشەویستی دەکات.

چی ڕوویدا: گەنجەکە پەیوەندی بەو کەسەوە دەکات و کێشەکەی بۆ باس دەکات. وەک خۆی دەڵێت، "ساحیرەکە" بەڵێنی ئەوەی پێداوە کە لە ماوەی دوو ڕۆژدا کچەکە پەیوەندی پێوە دەکات و داواکاری هاوسەرگیرییەکەی قبوڵ دەکات.

سەرەتا، جادووگەرەکە داوای 500 هەزار دینار دەکات و گەنجەکەش بۆی دەنێرێت. دوای ماوەیەک، داوای 500 هەزار دیناری دیکە دەکات بە بیانووی ئەوەی کە کارەکەی قورسە و نووشتەکە تێچووی زۆرە و خۆی ماندوو دەکات. گەنجەکەش بە ناچاری ئەو بڕە پارەیەی دیکەی بۆ دەنێرێت.

جادووگەرەکە داوایەکی سەیرتر دەکات؛ داوا لە گەنجەکە دەکات کە "کەڵەشێرێک بدزێت" و وێنەی بگرێت و بۆی بنێرێت، هەروەها داوا دەکات گەنجەکە وێنەی خۆی بگرێت و ڕیکلام بۆ جادووگەرەکە بکات و بڵێت کە ئەو "شێخێکی مەزبووت و زەمانە". گەنجەکە لە سەرەتاوە بەم داواکارییە ناڕەزایەتی دەردەبڕێت و داوای لێدەکات نەیکاتە دز، بەڵام لە کۆتاییدا تەنیا ڕیکلامی بۆ دەکات و ڤیدیۆی ڕیکلامەکەشی بۆ دەنێرێت.

پاش ئەوەی گەنجەکە هەموو داواکارییەکانی جادووگەرەکە جێبەجێ دەکات و بە خەیاڵی ئەوەوە دەبێت کە کچەکە لە ماوەیەکی کەمدا پەیوەندی پێوە دەکات، لەناکاو جادووگەرەکە بلۆکی دەکات و هیچ وەڵامێکی ناداتەوە. جادووگەرەکە ڤیدیۆی ڕیکلامکردنی گەنجەکەی بڵاوکردووەتەوە، کە بووەتە هۆی لەکەدارکردنی ناوبانگی گەنجەکە جگە لە لەدەستدانی بڕێک پارەی زۆر.

زانیاریی بەدەستهاتوو: ئەم گەنجە بە ئاڤای وت، ئەمە تەنیا چیرۆکی خۆی نییە و چەندین کەسی دیکەی سادەش، تەنانەت کچانیش، بە هەمان شێوە هەڵخەڵەتێندراون و داوای وێنە و ڤیدیۆی ڕیکلامیان لێکراوە .

لێدوانی فەرمی: نەبەز ئیسماعیل، وتەبێژی وەزارەتی ئەوقاف، بە ئاڤای وت، "هەر کەسێک جادوو و نووشتە بکات، شکاتی لێدەکەین، ئینجا ئەو کارە گوناحێکی گەورەیشە."