زیاتر لە 700 هەزار کەس لە ئارد و بەشەخۆراکی مانگانە بێبەش دەبن

ئاڤا نیوز

بەهۆی تۆمارنەکردنیان لە فۆڕمی ئەلیکترۆنی خۆراک، بە بڕیاری وەزارەتی بازرگانیی عێراق، بەشە ئاردی زیاتر لە 700 هەزار هاونیشتمانی هەرێمی کوردستان دەبڕدرێت، بەشە خۆراکی شەشەمیشیان پێنادرێت.

وێنە گەورەکە: ئەو خێزانانەی کە تاوەکو ئێستا پسوولەی خۆراکیان بە ئەلیکترۆنی نەکردووە، یان درەنگ ناوی خۆیان تۆمارکردووە لە بەشەخۆراک و بەشە ئاردی مانگانە بێبەش دەبن، تاوەکو ناویان دەچێتە نێو سیستەمەکە و ناویان لە لیستی نوێی مانگانە تۆماردەکرێت.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت، ئەم مانگەش بەهەمان مانگی ڕابردوو مامەڵە دەکرێت، 700 هەزار کەس لە بەشە ئارد بێبەش دەبن و بەشەخۆراکی شەشەمیش وەرناگرن.

ئەمەش بزانە: ئەو هاونیشتمانیانەی بەشە ئارد و بەشە خۆراکیان دەبڕدرێت قەرەبوو ناکرێنەوە، چونکە پێشووتر ئاگادارکراونەتەوە کە دەبێت ناوی خۆیان لە پسوولەی خۆراکی ئەلیکترۆنی تۆماربکەن، بەڵام نەیانکردووە.