لە خورماڵ تەرمی کەسێک لە شوێنی کارەکەی دۆزرایەوە

ئاڤا نیوز

پۆلیسی هەڵەبجە ڕایگەیاند، ئەمڕۆ تەرمی هاونیشتمانییەکی کاسبی قەزای خورماڵ گەیشتووەتە پزیشکی دادی هەڵەبجە و ئاسەواری فیشەک بە جەستەی هەبووە، کەسێکیش بەتۆمەتی کوشتنی ئەو کەسە دەستگیر کراوە.

لێدوانی فەرمی: ڕائید ئاکام قوتبەدین، وتەبێژی پۆلیسی هەڵەبجە بە ئاڤا میدیا وت، بەیانی ئەمڕۆ یەکشەممە، تەرمی هاونیشتمانییەکی قەزای خورماڵ بەناوی (وەهبی تاهیر) تەمەن 43 ساڵ هێنرایە پزیشکی دادی هەڵەبجە، سەرەتا وازانراوە ڕووداوی خۆکوژی بووە، بەڵام دوای لێکۆڵینەوەی سەرەتایی کەسێک لەسەر ئەم ڕووداوە دەستگیر کراوە و دۆسیەکەی نێردراوە بۆ ئاسایش.

وتەبێژی پۆلیسی هەڵەبجە دەشڵێت، ئەو هاونیشتمانییەی کوژراوە، خواردنگەی هەبووە و هەر لە شوێنی کارەکەی تەرمەکەی دۆزراوەتەوە، هاوکات لە شوێنی ڕووداوەکە دەمانچەیەکیش هەڵگیراوەتەوە.

ئەوەی پێویستە بیزانیت: قەزای خورماڵ سەر بە پارێزگای هەڵەبجەیە و 20 کیلۆمەتر لە سەنتەری پارێزگاکەوە دوورە.