زیاتر لە نیوەی دانیشتووانی هەرێمی كوردستان پرۆژەی ڕووناكییان پێگەیشتووە

ئاڤا نیوز

كارەبای 24 كاتژمێریی پرۆژەی ڕووناكی گەیشتووەتە نزیكەی چوار ملیۆن هاووڵاتی، كە دەكاتە زیاتر لە 50%ـی كۆی دانیشتووانی هەرێمی كوردستان.

وێنە گەورەكە: پڕۆژەی ڕووناکی، کە ئامانج لێی دابینکردنی کارەبای 24 کاتژمێرییە، پڕۆژەیەکی ستراتیژی کابینەی نۆیەمی حکومەتی هەرێمی کوردستانە، لە ئێستادا زیاتر لە نیوەی دانیشتووان لێی سوودمەند بوونە و تا کۆتایی ساڵی 2026 تەواوی هەرێمی کوردستان دەگرێتەوە.

جگە لەوەی تەواوی پارێزگای هەڵەبجەی گرتووەتەوە، هاووڵاتیانی سەنتەری شارەكانی هەولێر و دەوروبەری، دهۆك و سلێمانیش، زووتر لە پلانی داڕێژراو، دەستیان بە كارەبای 24 كاتژمێری گەیشتووە.

زانیاریی بەدەستهاتوو: بەپێی دوایین ئامار كە تایبەت دەست ئاڤا میدیا كەوتووە، لە پارێزگای هەولێر نزیكەی دوو ملیۆن هاووڵاتی، لە سلێمانی ملیۆنێك و 345 هەزار هاووڵاتی، لە دهۆك 351 هەزار هاووڵاتی و لە هەڵەبجەش 139 هەزار هاووڵاتی بوونەتە خاوەنی كارەبای 24 كاتژمێری، كە كۆی گشتیی سوودمەندبووانی پرۆژەكە گەیشتووەتە سێ ملیۆن و 770 هەزار كەس، كە لە هەمان كاتدا 987 هەزار هاوبەشی كارەبا ئێستا لەچوارچێوەی پرۆژەی ڕووناكی تۆماركراون.

لەلایەکی دیکەوە: هەر بەهۆی پرۆژەی ڕووناكی، تا ئێستا زیاتر لە سێ هەزار و 200 مۆلیدەی گازوایل لە گەڕەكەكان كوژێنراونەتەوە كە كاریگەرییەكەی لەسەر پاكبوونەوەی ژینگە هاوتای كەمبوونەوەی 600 هەزار تۆن گازی دوانەئۆكسیدی كاربۆنە لە ساڵێكدا، تا كۆتایی ساڵی 2026ـش، لە پلاندایە زیاتر لە حەوت هەزار مۆلیدە بكوژێنرێنەوە و ژینگەی هەرێمی كوردستان زیاتر پاكببێتەوە و ژاوە ژاو و دەنگی بێزاركەری مۆلیدەكانیش بەتەواوی نامێنن.