ئەفسەرێک دەست بەسەر ئۆتۆمبێلی پێشمەرگەیەکدا دەگرێت

ئاڤا نیوز

 

ئەفسەرێکی وەزارەتی پێشمەرگە دەستی بەسەر ئۆتۆمبێلی پێشمەرگەیەکدا گرتووە و چەندین ڕۆژە نایداتەوە. پێشمەرگەکە، کە نەیویست ناوی ئاشکرا بکرێت چیرۆکەکەی بۆ ئاڤا دەگێڕێتەوە.

 

چیرۆکی سەرەکی: ئەو پێشمەرگەیە کە نایەوێت ناسمانەکەی ئاشکرا بکرێت بەم شێوەیە چیرۆکەکە بۆ ئاڤا دەگێڕێتەوە: "ئێوارەی ڕۆژی دووشەممە، ئەفسەرێکی بەشی میرەی فەوجی سێی لیوای 17ی وەزارەتی پێشمەرگە هات و پێی وتم، 'سویچی ئۆتۆمبێلەکەتم بدەرێ، دەچم هەتا ماڵەوە ئاوێک بە خۆمدا دەکەم و دێمەوە.'"

 

پێشمەرگەکە بەردەوام دەبێت لە گێڕانەوەی چیرۆکەکەی و دەڵێت، "منیش ئۆتۆمبێلەکەم پێدا. دوای ئەوەی نەهاتەوە، چەند ڕۆژێک هەر پەیوەندیم پێوەکرد، بەڵام هەر جارە و بەهانەیەکی دەهێنایەوە و ئۆتۆمبێلەکەی بۆ نەدەهێنامەوە."

 

لێدوانی فەرمی: لەبارەی کێشەی ئەو پێشمەرگەیە ئاڤا پەیوەندی بە ئاسۆ، ئامر لیوای فەوجی سێی لیوای حەڤدەی پێشمەرگە کرد، ئەو دڵنیایی دا و وتی، "ئەفسەرەکە ڕووبەڕووی یاسا کراوەتەوە و ڕاگیراوە، لە وەزارەتی پێشمەرگە لێکۆڵینەوەی لەگەڵ دەکرێت."

 

ئەوەی پێویستە بیزانیت: لە درێژەی قسەکانیدا، پێشمەرگەکە باسی لەوە کرد کە چۆن ئەفسەرەکە بە بیانووی جۆراوجۆر ئۆتۆمبێلەکەی بۆ ناگەڕێنێتەوە، لەوبارەیەوە دەڵێت: "شەوێک تەلەفۆنم بۆ کرد و وتم، 'گەورەم شکر سەلامەتی؟ خۆ هیچ نەبووە، دەنگت نەبوو ئۆتۆمبێلەکە بهێنیتەوە.' ئەویش وتی، 'وەڵڵا ئەوەتام لە سلێمانی و خەمت نەبێ، بۆت دەهێنمەوە.' دواتر وتی، 'وەڵڵا ئەوەتام لە عەربەت.' ڕۆژی دواتر وتی، 'وەڵا تاوانێک لە ئۆتۆمێلەکەدا کراوە و لە ئاسایش دەستی بەسەرا گیراوە.' منیش وتم، 'کێشە نییە، خۆم دەچم لە ئاسایش دەیهێنمەوە.' ئەویش وتی، 'نا، تۆ مەڕۆ، خۆم بۆت وەردەگرمەوە و بۆت دەهێنمەوە.'"

 

کاریگەری و لێکەوتەکان؛ ئەو پێشمەرگەیە نیگەرانە لەو دۆخەی تێیکەوتووە و دەڵێت، "ئەو ئەفسەرە تووشی کێشەی کۆمەڵایەتی کردووم". دەشڵێت، بەو ئەفسەرەم وتووە، ساڵنامە، کارتی هەژماری من و کەلووپەلەکانم لەناو ئۆتۆمبێلەکەدان ئاگات لێیان بێ، ئەویش وتوویەتی خەمت نەبێ". وەک پێشمەرگەکە دەڵێت، "ئەوە چەند ڕۆژێکە مووچەم وەرنەگرتووە کارتی هەژمارەکەی من لەناو ئۆتۆمبێلەکەمە".