ئاڤای خەڵک؛ ئاڤا لە هۆکاری داخستنی دەرگای قوتابخانەیەکی هەولێر دەکۆڵێتەوە

ئاڤا نیوز

چەند ڕۆژێکە ئەو هاووڵاتیانەی دەیانەوێ ڕێکاری گواستنەوە بۆ قوتابیەکانیان بکەن، دەچنە یەکێک لە قوتابخانەکان دەبینن دەرگای داخراوە، بەڕێوەبەری گشتیی پەروەردەش دەڵێت، "لیژنەیەک بۆ لێکۆڵینەوە لەسەر ئەو بابەتە پێکدەهێنرێت."

چیرۆکی سەرەکی: چەند هاووڵاتییەک پەیوەندیان بە هێڵی گەرمی ئاڤا کردووە، دەڵێن یەکێک لە قوتابخانەکانی گەڕەکی فەرمانبەرانی شاری هەولێر، دەچن بۆ ئەوەی مامەڵەی گواستنەوە بۆ قوتابیەکانیان بکەن، کارگوزاری قوتابخانەکە دەرگایان لێناکاتەوە بەبیانووی ئەوەی بەڕێوەبەری قوتابخانە لەوێ نییە و گەشتی عومرەی کردووە.

ئەوەی پێویستە بیزانیت: بە بڕیاری وەزارەتی پەروەردە، لەدوای 2025-09-01 ـەوە، دەبێت دەرگای سەرجەم قوتابخانەکان بکرێتەوە، بەمەبەستی ڕێکخستنی قوتابخانە و ڕاییکردنی کاروباری قوتابیان، بەڕێوەبەر و جێگرەکەی دەبێت دەوام بکەن.

لێدوانی فەرمی: لوقمان سەعید، بەڕێوەبەری پەروەردەی گشتیی هەولێر؛ بە ئاڤای گوت، "بەدواداچوونمان کردووە و دەرکەوتووە، بەڕێوەبەری قوتابخانە قاچی شکاوە و جێگرەکەیشی گەشتی عومرەی کردووە، هەردووکیان بە شێوەیەکی یاسایی مۆڵەتیان وەرگرتووە، هەروەها لیژنەیەک لەسەر ئەو بابەتە پێکدەهێنین و لێکۆڵینەوەی تەواوی لەسەر دەکەین."