جووتسایدی شێخان - لالش تەواوکرا و لەنزیكترین كاتدا بەڕووی هاتووچۆ دەكرێتەوە

ئاڤا نیوز

پڕۆژەی جووتسایدی شێخان - لالش تەواو كرا و، لە ئاییندەیەكی نزیكدا دەچێتە خزمەتی هاووڵاتیان.

چیرۆكی سەرەكی: کاروانی ئاوەدانیی کابینەی نۆیەم بۆ سەرجەم ناوچە جیاوازەکانی کوردستان بەردەوامە و خزمەتکردنی هاووڵاتییان و بەهێزکردنی ژێرخانی ئابووری و سێكتەری ڕێگاوبان، لە پێشینەی کارەکانی كابینەی نۆیەمی حكومەتی هەرێمی كوردستانە.

لێدوانی فەرمی: ئەندازیار سەمیر ڕێکانی، سەرپەرشتیاری پڕۆژەکە بە ئاڤا میدیای ڕاگەیاند: بۆ جێبەجێكردنی پڕۆژەكە، ماوەی 400 ڕۆژ دانرابوو، بەڵام بە كەمتر لە ماوەی دیاریكراودا، پڕۆژەكە تەواوكرا.

زانیاریی زیاتر: گوژمەی خەرجكراو لە پڕۆژەی جووتسایدی شێخان - لالش لە پارێزگای دهۆک 26 ملیار دینارە، درێژییەكەی 9 کیلۆمەترە و پانیی شەقامەكە 25 مەترە و بە شێوازێکی ستاندارد و سەردەمیانە دروستكراوە و هێڵكاریی پێویستی بۆ ئەنجامدراوە، لە دروستكردنیشی، بە تەواوی پشت بە دەستی كاری ناوخۆیی بەستراوە.

بۆچی گرنگە: ئەم ڕێگایە ئاسانکاری زۆر بۆ سەردانیکارانی پەرستگای لالش دەکات و، لەڕووی گەشتیاریی ئایینی گرنگی زۆری دەبێت، ژمارەیەک گوندنشینی سنوورەکەش سوود لەم ڕێگەیە وەردەگرن.