ترەمپ:  پووتین و زێلیسنکی نایانەوێت قسە لەگەڵ یەک بکەن

ئاڤا نیوز

سەرۆکی ئەمەریکا دەڵێت، هەوڵی زۆریداوە تا ئەوەی شەڕی نێوان ڕووسیا و ئۆکراینا ڕابگرێت، بەڵام سەرۆکی هەردوو وڵات ڕقێکی زۆریان بەرامبەر یەکتر هەیە و نایانەوێت قسە لەگەڵ یەکتر بکەن.

وێنە گەورەکە: سێ ساڵ دەبێت شەڕێکی قورس لەنێوان ڕووسیا و ئۆکراینا هەیە. لە کەمپەینی هەڵبژاردنی سەرۆکایەتی ئەمریکا، دۆناڵد ترەمپ بەڵێنیدا بە زووترین کات ئەم شەڕە ڕابگرێت، بەڵام دوای نۆ مانگ هێشتا هەوڵەکانی بێسوودن.

لێدوانی فەرمی: دۆناڵد ترەمپ، سەرۆکی ئەمریکا دەڵێت: پێم خۆشە شەڕی ئۆکراینا ڕابگرم، بەڵام ئەو کارە قورسە، ڕق و کینەی نێوان ڤلادیمێر پووتین، سەرۆکی ڕووسیا و ڤۆلۆدیمیر زێلێنسکی، سەرۆکی ئۆکراینا یەکجار زۆرە و ئەوان نایانەوێت قسە لەگەڵ یەکتر بکەن.

لەلایەکی دیکەوە: ترەمپ، ڕەخنەی لە ئەوروپا گرت و ڕایگەیاند، ئەوروپا بەردەوامە لە کڕینی نەوت لە ڕووسیا، منیش نامەوێت ئەوان تەنانەت جگەرەش لە ڕووسیا بکڕن، ئەو سزایانەی کە دەیسەپێنن تووند نین و دەبێت ڕێککارەکانیان تووند بکەنەوە.