هێرشەکەی ئیسرائیل ئێران و قەتەری کۆکردەوە

ئاڤا نیوز

لەبارەی هێرشەکەی هەفتەی ڕابردووی ئیسرائیل بۆ سەر قەتەر، هەر یەکە لە سەرۆکوەزیران و هەردوو وەزیرانی دەرەوەی قەتەر و ئێران کۆبوونەوە هەردوولا جەختیان لە هەماهەنگی زیاتر کردوەتەوە.

چیڕۆکی سەرەکی: ڕۆژی 2025-09-09، ئیسرائیل هێرشی کردە سەر بارەگای شاندی دانوستانکاری بزووتنەوەی حەماس لە دەوحەی پایتەختی قەتەر، بە ئامانجی کوشتنی سەرکردەکانی بزووتنەوەی حەماس، بەڵام لە دوای هێرشەکە ئاشکراکرا کە سەرکردەکانیان ڕزگاریان بووە بەبێ ئەوەی وردەکاریی زیاتر بڵاوبکرێتەوە.

زانیاریی بەدەستهاتوو: شێخ محەممەد بن عەبدولڕەحمان بن ئالسانی، سەرۆکوەزیران و وەزیری دەرەوەی وڵات، لەگەڵ عەباس عێراقچی، وەزیری دەرەوەی ئێران کۆبووەوە، لە پەراوێزی کۆبوونەوەی ئامادەکاری بۆ لووتکەی نائاسایی عەرەبی - ئیسلامی کە بڕیارە ئەمڕۆ دووشەممە لە دەوحە بەڕێوەبچێت

زانیاریی زیاتر: هەردوولا باسیان لە پتەوکردنی پەیوەندیی دوولایەنە و ڕێگاکانی بەهێزکردنی هاوکاریی لەنێوان هەردوولا کردەوە، پێشهاتەکانی ناوچەکە بەتایبەتی هێرشەکەی ئەم دواییەی ئیسرائیل کە دەوحەی کردە ئامانج تاوتوێی کرا.

ئەوەی لەبارەیەوە دەگوترێت: قەتەر دووپاتیکردەوە هەموو ڕێوشوێنێکی پێویست دەگرێتەبەر بۆ پاراستنی ئاسایشی وڵاتەکەی، لە بەرامبەردا ئێران پشتیوانی خۆی بۆ قەتەر دووپاتکردەوە هێرشەکەی ئیسرائیلی وەک پێشێلکردنی ئاشکرای یاسا نێودەوڵەتییەکان پێناسە کرد.