هادی عامری: عێراق بە دۆخی هەستیار تێپەڕ دەبێت بەرژەوەندی گشتیی لەبەرچاو بگرن

ئاڤا نیوز

ئەمینداری گشتیی ڕێکخراوی بەدر، جەخت لەسەر "گرنگیی پابەندبوون بەوپەڕی بەرپرسیارێتی و وریایی تەواو لە دەربڕینی بۆچوون و وەرگرتنی هەڵوێستەکاندا" دەکاتەوە، بەتایبەت لەم "دۆخە هەستیارەی عێراق پێیدا تێپەڕ دەبێت و ئەو ئاڵنگارییانەی ناوچەکە ڕووبەڕووی دەبێتەوە."

ڕاگەیێنراوی فەرمی: هادی عامری، ئەمینداری گشتیی ڕێکخراوی بەدر لە ڕاگەیەندراوێکدا کە وێنەیەکی دەست ئاڤا میدیا کەوتووە، داوا لە بەرپرسانی ڕێکخراوی بەدر دەکات "ئەوپەڕی بەرپرسیارێتی بگرنە ئەستۆ و بەرژەوەندی گشتی لەبەرچاو بگرن و دوور بکەونەوە لە هەر لێدوانێک کە ببێتە هۆی تێکدانی سەقامگیری سیاسی و ئاڵۆزکردنی دۆخەکە."

لەهەمان کاتدا: عامری ئاماژەی بەوەشدا " تێکدانی سەقامگیری سیاسی و ئاڵۆزکردنی دۆخەکە لە بەرژەوەندی ئێمە و بەرژەوەندی عێراقی خۆشەویست و خاوەن توانا نییە." هەروەها جەختیکردەوە کە "تاکە لایەنی بەرپرس لە دەربڕینی هەڵوێستەکان، تەنیا مەکتەبی سیاسییە."

لە کۆتاییدا، ئەمینداری گشتیی ڕێکخراوی بەدر هیوای خواست کە "هەموو برایان پابەندی ئەو بڕیارە بن."