حەج و عومرەی کوردستان: هیچ عومرەکارێکی کورد لەسەر ماددەی هۆشبەر دەستگیر نەکراوە

ئاڤا نیوز 


بەرێوەبەرایەتیی گشتیی حەج و عومرەی هەرێمی کوردستان ڕوونکردنەوە لەسەر دەسگیرکردنی دوو تۆمەتبار بە ماددەی هۆشبەرەوە دەدات، جەخت لەوە دەکاتەوە کە هیچ کامیان سەر بە هەرێمی کوردستان نین.

چیرۆکی سەرەکی: لە چەند ڕۆژی ڕابردوودا، دوو تۆمەتبار 147 کیلۆ ماددەی هۆشبەریان بردووەتە وڵاتی سعودییە، ویستوویانە لە عێراقەوە ماددەی هۆشبەر بپەڕێنەوە، بەڵام لە شاری مەدینەی وڵاتی سعودییە دەستگیرکراون.

لێدوانی فەرمی: کاروان ستوونی، وتەبێژی بەرێوەبەرایەتیی گشتیی حەج و عومرەی کوردستان؛ بە ئاڤای گوت، "ئەو دوو تۆمەتبارە بەهیچ شێوەیەک نە شوفێری پاس نە عومرەکاری کورد نین و تەنانەت دانیشتووی ناوچەکانی هەرێمی کوردستانیش نین، بەڵکو خەڵکی حیللە و سەڵاحەددین."

ئەمەش بزانە: بەرێوەبەرایەتیی گشتی حەج و عومرەی هەرێمی کوردستان ئەوە روون دەکاتەوە کە سەرجەم کۆمپانیاکانی حەج و عومرە پابەندن بە ڕێنماییەکانی بەرێوەبەرایەتیی گشتی حەج وعومرەی هەرێمی کوردستان و وەزارەتی ئەوقاف و کاروباری ئایینی.