کار بۆ ڕێکخستنەوەی بازاڕ و شەقامەکانی هەولێر دەکرێت

ئاڤا نیوز

لە پێناو ڕێگەگرتن لە زێدەڕۆیی و مەترسییەکانی ئاگرکەوتنەوە، بازاڕ و شەقامەکانی هەولێر ڕێکدەخرێنەوە.

وێنە گەورەکە: ڕۆژی 15-9-2025، بە مەبەستی ڕێکخستنەوە و باشترکردنی بازاڕ و شەقام و گەڕەکەکان، کۆبوونەوەیەک لە قائیمقامییەتی هەولێر ئەنجامدرا، کە بەڕێوەبەری ئاسایشی، سەرۆکی شارەوانی، بەڕێوەبەری کشتووکاڵی تێدا بەشداربوون.

لێدوانی فەرمی: نەبەز عەبدولحەمید، قائیمقامی هەولێر بە ئاڤا میدیای ڕاگەیاند: هەموو بازاڕە میللیەکان و شەقامە گشتییەکان ڕێکدەخرێنەوە و ڕێگە بە زێدەڕەویی نادرێت، هەر دوکاندارێک پەردەی بۆ دوکان داناوە یان شتی هێناوەتە دەرەوە لادەبرێن، یان لە شەقامە گشتییەکاندا عارەبانە دانرابێت ڕێکدەخرێنەوە.

قائیمقامی هەولێر دەڵێت: هەر کەسێک پابەندی ڕێنماییەکان نەبێت و سەرپێچی بکات، ئەوا سزا دەدرێن.

بۆچی گرنگە: ئەم هەڵمەتە سەرەڕای ئەوەی ڕێگری لە زێدەڕەوییەکان دەکات، هاوکات سیمای جوان بۆ بازاڕ و شەقامە گشتییەکان دەگەڕێنێتەوە و لە جەنجاڵی دووریان دەخاتەوە، ئەمە سەرەڕای ئەوەی بازاڕەکان لە مەترسییەکانی ئاگرکەوتنەوە و سووتان دەپارێزێت.