پەرلەمانی عێراق لەبارەی 11 پڕۆژە یاسا کۆدەبێتەوە

ئاڤا نیوز

بۆ دەنگدان و خوێندنەوەی 11 پرۆژە یاسا، یڕیارە ئەمڕۆ پەرلەمانی عێراق کۆببێتەوە، ئەمەش دوای ئەوەی دوێنی دووشەممە نیسابی یاسایی بۆ کووبونەوەکە تەواو نەکرا. 

چیرۆکی سەرەکی: دوانی نزیکەی 20 ڕۆژ لە دوایەمین دانیشتنی پەرلەمانی عێراق، بڕیار بوو دوێنی دووشەممە 15-9-2025 جارێکی دیکە پەرلەمانی عێراق کۆببێتەوە بۆ دەنگدان و گفتوگۆکردن لەسەر حەوت پرۆژە یاسا، بەڵام بەهۆی نەبوونی نیسابی یاسایی کۆبوونەوەکە بۆ ئەمڕۆ دواخرا.

ڕاگەیێنراوی فەرمی: بەگوێرەی ڕاگەیێنراوی فەرمانگەی ڕاگەیاندنی ئەنجوومەنی نوێنەران، خشتەی کارەکانی کۆبوونەوەی ئەمڕۆ سێشەممە کە لەکاتژمێر یەکی پاش نیوەڕۆ بەڕێوەدەچێت بریتیییە لە:

دەنگدان لەسەر پڕۆژەیاسای هەمواری سێیەمی یاسای قەرەبووکردنەوەی زیانلێکەوتووان ئەوانەی بەشێک لە جەستەیان لەدەستداوە.

دەنگدان لەسەر پڕۆژەیاسای هەمواری یەکەمی یاسای دەستەی نیشتمانیی چاودێریی ناوەکی و تیشکی و کیمیایی و بایۆلۆجی.

دەنگدان لەسەر پڕۆژەیاسای ڕێکخستنی وزەی نوێبووەوە.

دەنگدان لەسەر پڕۆژەیاسای تەندروستیی دەروونی.

دەنگدان لەسەر پڕۆژەیاسای پەسەندکردنی ڕێککەوتننامەی هاندانی و پاراستنی هاوبەشی وەبەرهێنان لەنێوان عێراق و سعودییە.

دەنگدان لەسەر پڕۆژەیاسای هەمواری چوارەمی یاسای وەبەرهێنانی پیشەسازی بۆ هەردوو کەرتی تایبەت و تێکەڵاو.

دەنگدان لەسەر پڕۆژەیاسای هەمواری یەکەمی یاسای بەرگریی شارستانی.

خوێندنەوەی یەکەم بۆ هەمواری سێیەمی پڕۆژەیاسای خزمەتی زانکۆ.

خوێندنەوەی یەکەم بۆ هەمواری دووەمی پڕۆژەیاسای قەرزی کشتوکاڵی.

ڕاپۆرت و گفتوگۆکردن لەسەر هەمواری یەکەمی پڕۆژەیاسای دەستەی گشتی داهاتی ئیتیحادی.

ڕاپۆرت و گفتوگۆکردن لەسەر پڕۆژەیاسای زانکۆی فڕۆکەوانی سەربازی.

ئەمەش بزانە: کەمتر لە دوو مانگ بۆ هەڵبژاردنی خولی نوێی پەرلەمانی عێراق ماوە و ئەم خولەی پەرلەمان دانیشتنەکان بە سستی بەڕێوەدەبات و کۆتا دانیشتنی 27ـی ئاب بوو، واتە لە 19 ڕۆژی ڕابردوودا کرا بوو، پێویست بوو لەو ماوەیە لانیکەم چوار کۆبوونەوە بکات، بەڵام هیچ کۆبوونەوەیەکی نەکردووە.