چێشتخانەیەکی هەولێر شۆستەی شەقامێک دەکات بە گەراجی ئۆتۆمبێل

ئاڤا نیوز

 

لەبارەی گلەیی و گازندەی چەند هاونیشتمانییەک کە پەیوەندییان بە ئاڤاوە کردووە و دەڵێن، "چێشتخانەی فارووق شۆستەیەکی کردووە بە گەراج و داوا دەکەین لاببرێت"، لەبەرامبەردا سەرۆکی شارەوانیی هەولێر دەڵێت، "ڕێکاری پێویست دەگرینەبەر".

 

بابەتی سەرەکی: ژمارەیەک هاونیشتمانی پەیوەندییان بە ئاڤاوە کردووە و دەڵێن، چێشتخانەی کەباب فارووق لە مەفرەقی ئیسکانی هەولێر شۆستەکەی کردووە بە گەراج، لەلایەکی دیکەش دووکانی تایە فرۆشەکانی ترافیکی ئیسکان لەناوەڕاستی شەقامەکەدا تایەی ئۆتۆمبێل دەگۆڕن و شوێنەکەیان کردووە بە سەناعە، بەوهۆیەوە قەرەباڵقییەکی زۆر لە کاتی کرانەوەی ترافیکی ئیسکان دروست دەبێت. ئەو هاونشتمانییانە داوا لە لایەنی پەیوەندیدار دەکەن ئەم زێدەڕەویانە نەهێڵێت.

 

لێدوانی فەرمی: عەقید هێمن ئەمین، وتەبێژی بەڕێوەبەرایەتیی هاتووچۆی هەولێر بە ئاڤا میدیای ڕاگەیاند: "شۆستە بۆ هەموو خەڵک وەکو یەکە و نابێت کەس قۆرخی بکات، یان بۆ مەبەستی دیکە وەک گەراجی تایبەت بەکاریبهێنێت، وێنە و ڤیدیۆکان کە هاونیشتمانییان گرتوویانە بۆ بەڕێوەبەرایەتیی هاتووچۆی ناو شار دەنێرم تا لێپێچینەوە بکەن".

 

لەلایەکی دیکەوە: کارزان هادی، سەرۆکی شارەوانیی هەولێر بە ئاڤا میدیای ڕاگەیاند: "هەر ڕێکارێک پێویست بێت دەیگرینەبەر، لەگەڵ بەڕێوەبەری شارەوانیی چواری هەولێر لەوبارەیەوە قسە دەکەم، ئەوەی پێویست بێت بۆ لابردنی زێدەڕەوی دەیکەین".