ئەردۆغان: ناتانیاهۆ لەگەڵ هیتلەر خزمایەتی هەیە

ئاڤا نیوز

 

ڕەجەب تەیب ئەردۆغان، سەرۆککۆماری تورکیا جارێکی دیکە بە تووندی هێرش دەکاتە سەر بنیامین نەتانیاهۆ، سەرۆکوەزیرانی ئیسرائیل و دەڵێت، "نەتانیاهۆ لە ڕووی ئایدۆلۆژیاوە خزمایەتی لەگەڵ هیتلەر هەیە، کردەوەکانی ئەو دووبارە دەکاتەوە و هەمان چارەنووسی ئەوی دەبێت". 

   
چیڕۆکی سەرەکی: ئەردۆغان دوای بەشداریکردنی لە لووتکەی نائاسایی هاوبەشی ڕێکخراوی هاریکاریی ئیسلامی و کۆمکاری عەرەبی لە دەوحەی پایتەختی قەتەر، لە کاتی گەڕانەوەیدا بۆ تورکیا لەنێو فڕۆکەکەیدا بۆ ڕۆژنامەنووسان قسەی کرد.

 

لێدوانی فەرمی: ئەردۆغان سەبارەت بە هێرشی ئیسرائیل بۆ سەر شاندی حەماس لە قەتەر ڕایگەیاند: کردنە ئامانجی شاندی دانوستانکار لەلایەن ئیسرائیلەوە لەم هێرشە ترسنۆکانەیەدا، بەئاشکرا ئاڵنگاریکردنی یاسا نێودەوڵەتییەکان و سیستمی جیهانییە.

-نەتانیاهۆ لە ڕووی ئایدۆلۆژییەوە لەگەڵ هیتلەر خزمایەتی هەیە و "نەتانیاهوش هەمان چارەنووسی هیتلەری دەبێت".

-تورکیا لە هەموو بارودۆخێکدا بەردەوام دەبێت لە هەڵگرتنی ئاڵای دۆزی فەڵەستین. ئەمە بەرپرسیارێتییەکە کە باوەڕ و مێژوومان خستوویەتە سەر ئەستۆمان.

-هیوادارم لە میانی کۆبوونەوەی گشتیی نەتەوە یەکگرتووەکاندا کە لە ڕۆژانی داهاتوودا بەڕێوەدەچێت، بەرەی مرۆڤایەتی فراوانتر بێت. ئەم خەباتە سەختە بووەتە دۆخێکی چارەنووسساز بۆ بەرگریی کردن لە گەلی فەڵەستین و یاسای نێودەوڵەتیی و کەرامەتی مرۆڤایەتیی.

-ئەوانەی ئیسرائیل بەڕێوەدەبەن، جگە لە تۆڕێکی تاوانکاری کە تێگەیشتنی ڕادیکاڵی خۆیان گۆڕیوە بۆ ئایدیۆلۆژیایەکی فاشیستی، هیچی دیکە نین.

لەلایەکی دیکەوە: سەبارەت بە داننان بە دەوڵەتی فەڵەستین لەلایەن وڵاتانی ڕۆژئاوا، ئەردۆغان ڕایگەیاند: پێموایە داننان بە فەڵەستین لەلایەن وڵاتانی ڕۆژئاواوە وەک دەوڵەت، ئیسرائیل زیاتر گۆشەگیر دەکات. جارێکی دیکە لە زەمینەی نەتەوەیەکگرتووەکاندا ئەمە دەخەینەوەڕوو. پشتیوان بە خودا هاوار و ناڵەی ستەمدیدەکان بە جیهان دەگەینین.