لە هەولێر بازارێکی هاوچەرخ بۆ فرۆشتنی پاسکیل و ماتۆڕسکیل دروست دەکرێت

ئاڤا نیوز

 

بڕیارە لە ماوەیەکی نزیک بازارێکی هاوچەرخ و مۆدێرن بۆ کڕین و فرۆشتنی پاسکیل و ماتۆڕسکیل لە باشووری ڕۆژهەڵاتی شاری هەولێر دروست بکرێت.

 

بۆچی گرنگە: بە مەبەستی ڕێکخستنەوە و جوان کردنی سیمای شاری هەولێر و نەهێشتنی جەنجاڵی، بڕیارە بازاڕێکی مۆدێرن بۆ کڕین و فرۆشتنی پایسکیل و ماتۆڕسکیل دروست دەکرێت، هەموو پاسکیل فرۆش و ماتۆڕ فرۆشەکان لەیەک شوێن کۆدەکرێنەوە و پاسەوانی تایبەتی بۆ دادەنرێت.

 

لێدوانی فەرمی: ئۆمێد خۆشناو، پارێزگاری هەولێر بە ئاڤا میدیای ڕاگەیاند، بەمەبەستی ڕێکخستنەوە و جوانترکردنی سیمایی شار و نەهێشتنی جەنجاڵی هاتووچۆی هاوڵاتییان، کۆبوونەوەیەکی تایبەت لەگەڵ ئەنجوومەنی بازاڕی پایسکیل و ماتۆڕسکیلان، سەبارەت بە دروستکردنی بازاڕێکی هاوچەرخ بۆیان ئەنجام درا، لەو کۆبوونەوەیە بڕیاردرا لەسەر دروستکردنی بازاڕێکی هاوچەرخ بۆ پایسکیل و ماتۆڕسکیل لە بەشى باشوورى ڕۆژهەڵاتى شارى هەولێر لەسەر شەقامى کۆنى  کەرکووک – هەولێر لەسەر ڕووبەری 10 دۆنم زەوی بە گوژمەی دوو ملیار و 887 ملیۆن و 574 هەزار دینار.

 

ئەمەش بزانە؛ بازاڕەکەی ئێستا دەکەوێتە ناو جەرگەى شارى هەولێر و سیمایەکی ناشیرین و قەرەباڵغی و جەنجاڵییەکی زۆری بۆ هاووڵاتییان دروستکردووە، سەرباری بچووکی دووکانەکانیان و تەسکی شەقامەکەیان، کە وای کردووە زۆربەى دووکاندارەکان پاسکیل و ماتۆڕەکان لەسەر شەقام نمایش بکەن بۆ فرۆشتن، جگە لەوەش چەندین کەسی تر کە لەوبازاڕە کە دووکانیان نییە هەر لەسەر شەقام مامەڵەى کڕین و فرۆشتنی پایسکیل و ماتۆڕ دەکەن، ئەوەش گرفتی زۆری بۆ هاتووچۆی هاووڵاتییان دروستکردووە.

 

زانیاریی زیاتر: پارێزگاری هەولێر دەڵێت، وێڕای پاڵپشتیکردن و لە بەرچاوگرتنی کار و کەسابەتی کاسبکارانی بازاڕەکە و هاوکاری کردنیان، ئامانجی دروستکردنى ئەو بازاڕى هاوچەرخە، جوانکردنى سیمای شار و نەهێشتنى ئاستەنگیی هاتووچۆ بۆ ناو سەنتەری شار و ڕێکخستنى جووڵەى بازرگانى و دابینکردنى ژینگەیەکى ڕێکخراو و ئاسودەیە بۆ کاسبکارانی بازاڕەکە و کڕیارانی و بنبڕکردنى ناڕێکی و هەڕەمەکى و ڕێکخستنى بازاڕەکەیە بە شێوەیەکى ئەندازەیی و ئاسانکردنى گەیشتن و کارکردن و جوڵانەوەیانە لە ڕووبەرێکى فراواندا و دیاریکردنى شوێنى تەرخانکراو بۆ کڕین و فرۆشتن کە چاودێریکردن و ئیدارەیەکی باشتری هەبێت.