ئەنجوومەنی وەزیرانی کوردستان لەبارەی مووچەی فەرمانبەران کۆدەبێتەوە

ئاڤا نیوز

 

بڕیارە سبەی چوارشەممە ڕێککەوتی 17ـی 9ـی 2025 ئەنجوومەنی وەزیرانی هەرێمی کوردستان بە سەرپەرشتی سەرۆکوەزیران مەسرور بارزانی کۆببێتەوە و سێ تەوەری گرنگ تاوتوێ بکات.

 

زانیاریی تایبەت: بەگوێرەی زانیارییەکانی ئاڤا بڕگەی یەکەمی کارنامەی دانیشتنەکە بریتی دەبێت خستنەڕووی دواپێشهاتەکانی دۆسیەی هەناردەکردنی نەوتی هەرێمی کوردستان و بابەتی داهاتە نانەوتییەکان و مووچە و شایستە داراییەکانی مووچەخۆرانی هەرێمی کوردستان. ئەمەش دوای ئەوەی ئەمڕۆ سێشممە لە کۆبوونەوەی ئەنجوومەنی وەزیرانی عێراق بڕیار لەسەر پەسەندکردنی لێکتێگەیشتنی نێوان هەردوو حکومەت درا. لە کۆبوونەوەی سبەی تاوتوێی میکانیزم و ڕێککارەکانی جێبەجێکردنی پابەندیی نێوان هەردوو حکومەت دەکرێت.

 

ئەوەی پێویستە بیزانیت: لە کۆبوونەوەی ئەمڕۆی ئەنجوومەنی وەزیرانی عێراق بە سەرۆکایەتیی محەممەد شیاع سوودانی، سەرۆکوەزیرانی عێراق ئەنجامی ئەو لێکتێگەیشتنانەی لەنێوان هەرێمی کوردستان و حکومەتی عێراق و کۆمپانیاکان هەبوو، پەسەندی کرد و ڕێککەوتنەکەشی بۆ لیژنەی ڕاوێژکاری وەزارەتی نەوتی عێراق بەرزکردەوە بۆ ئەوەی لەماوەی 48 کاتژمێردا ڕای خۆی لەسەر بدات و بچێتە باری جێبەجێکردنەوە.

 

لەلایەکی دیکەوە: تەوەری دووەمی دانیشتنەکە بریتی دەبێت لە "یەکخستنی ڕێکارە داراییەکان لەگەڵ حکومەتی فیدراڵ". ئەم بڕگەیە لەلایەن وەزارەتی دارایی و ئابوورییەوە دەخرێتە بەردەم ئەنجوومەنی وەزیران و بڕیارە بەڕێوەبەری گشتیی باج و خانووبەرەی میریی هەرێمی کوردستان وەک میوان بەشدار بن لە کۆبوونەوەکەدا بۆ خستنەڕووی وردەکارییەکان و ڕوونکردنەوەی پێویست.

 

زانیاریی زیاتر: تەوەری سێیەمیش تایبەت دەبێت بە دەستپێکی ساڵی نوێی خوێندن و ئەم بڕگەیەش لەلایەن وەزیری پەروەردەوە دەخرێتە بەردەم ئەنجوومەنی وەزیران بۆ خستنەڕووی پلان و ئامادەکارییەکانی وەزارەت بۆ دەستپێکی پڕۆسەی خوێندن.