جووتیارە نموونەییەکەی هەولێر پەتاتەیەکی تایبەت و جیاواز بەرهەم دەهێنێت

ئاڤا نیوز

جووتیارێکی نموونەیی شاری هەولێر، بەناوی ئەسکەندەر گاینجی، توانیویەتی جۆرێکی تایبەت و ناوازەی پەتاتە بەرهەم بهێنێت کە ڕەنگەکەی مۆرە. جووتیارەکە لەبەر خۆشەویستی بۆ ئاڤا ئەم پەتاتەیەی ناوناوە "ئاڤا"، سەرەڕای ڕەنگە جیاوازەکەی، لە تام و بۆندا هیچ جیاوازییەکی لەگەڵ پەتاتەی ئاساییدا نییە.

لێدوانی فەرمی؛ ئەسکەندەر گاینجی بە عوبێد هەرکی، پەیامنێری ئاڤای ڕایگەیاند، ماوەی دوو ساڵە بنەتۆوی ئەم پەتاتەیەی لە دەرەوەی وڵاتەوە هێناوە. دەشڵێت، ئەمە سەرەتای کارەکەیەتی و لە قۆناغی یەکەمدا تەنها سەبەتەیەکی کەم لەم جۆرە پەتاتەیەی بەرهەم هێناوە. پلانی هەیە لە ساڵی داهاتوودا بەرهەمەکەی زیاتر بکات و بیداتە دەست جووتیارانی تریش بۆ ئەوەی ئەوانیش سوودی لێ ببینن و بەرهەمی بهێنن.

ئەوەی پێویستە بیزانیت: یەکێک لە تایبەتمەندییە سەرنجڕاکێشەکانی ئەم پەتاتەیە ئەوەیە کە کاتێک بە چەقۆ لەت دەکرێت، ناوەکەی دەستت مۆر دەکات.

 

لەلایەکی دیکە؛ سەبارەت بە ناونانی پەتاتەکە، ئەسکەندەر بە پێکەنینەوە گوتی: "لەبەر ئەوەی ڕەنگی لۆگۆی کەناڵی ئاڤا مۆرە و منیش زۆر خۆشەویستیم بۆ ئاڤا هەیە، بڕیارم دا ناوی ئەم پەتاتەیە بنێم 'پەتاتەی ئاڤا'."